4-ka-bulan nga gilugos tabangan sa Kapitolyo
GAWAS sa pag-abaga sa bayranan sa tambalanan, ug legal nga tabang, ipaayo sa Kapitolyo ang pinuyanan sa pamilya niadtong 4-ka-buwan nga bata nga gidagit ug giingong gilugos sa siyudad sa Carcar.
Ang kagamay ug kaguba sa ilang balay usa sa hinungdan kon nganong sayon nga nakasulod ang suspek ug gikuha ang bata.
Luwas na ang kahimtang sa 4-ka-buwan nga masuso nga gidagit ug giingong gilugos sa suspek nga si Jonathan Martin sa Carcar City sa miaging semana.
Nakagawas na kini sa tambalanan niadtong Sabado apan kinahanglan pa’ng mapaubos sa intervention sa Department of Social Welfare and Development (DSWD) ang inahan niini.
Si Bise Gob. Agnes Magpale niingon nga gawas sa psychosocial intervention alang sa inahan, posibleng mohatag ang Kapitolyo og pinansiyal nga ayuda aron makasugod ug gamayng panginabuhian.
Gawas niini, plano ni Magpale nga lihukon sa Kapitolyo ang pagpaayo sa pinuy-anan sa ilang pamilya.
Giingong tungod sa kakabos, kurtina lang maoy gitabil o gihimong pultahan sa ilang panimalay, hinungdan nga sayon nakasulod ang suspek.
Sigun sa bise gobernador, siya mismo maoy mohangyo kang Gob. Hilario Davide III aron matuman kini ug matabangan ang nagkinahanglang pamilya.
Dugang ni Magpale, abagahon sa Kapitolyo ang bayranan sa tambalanan, diin gi-admit ang batang biktima.
Human ang insidente, gipaubos sa minor surgery ang masuso aron paghatag ug pagtagad sa minor laceration nga naangkon niini diha sa iyang kinatawo.
Samtang, gipaabot karon sa opisina ni Magpale ug sa Provincial Council for the Welfare of Children ang hangyo gikan sa kapulisan sa Carcar aron makaintervene ang Kapitolyo sa kaso sa bata.
Kon makumpleto na ang mga ebidensiya, hayan nga lakip ang probinsiya sa mangusog pagpasaka ug kaso batok sa responsable sa krimen.