Pagkapukan sa magtiayong Moreno
DAW maisip nga daman o bangungot alang sa magtiayong Mayor Augustus Ceasar “Chonse” ug Cynthia Moren kining nahitabo kanila human sila naghari sa pulitika sa lungsod sa Aloguinsan sulod sa pipila ka dekada. Mao na kaha kini ang katapusan sa ilang pamulitika?
Gikan sa pagkasmall time contractor, midominar ang magtiayong Moreno sa pulitika sa maong lungsod gumikan sa ilang kaugalingong diskarte ug gumikan usab siguro kay nakasandig sila sa dakong banay sa pulitika nga maoy nagagak kanila. Nailang loyal supporters ang mga Moreno sa banay’ng Garcia. Apan gumikan lagi sa pagtuo nga wala nay makabuntog kanila, nagabuso sa gahum. Apan karon napukan na ang magtiayong Chonse ug Cynthia Moreno. Hinaot nga kining nahitabo sa mga Moreno magsilbing leksiyon sa ubang mga banay nga naghari usab sa pulitika sa ilang tagsatagsa ka balwarte.
Gumikan lagi kay ligon sila sa pulitika, nagpulipuli lang ang magtiayon sa posisyon. Human matapos ang termino ni Chonse isip mayor, si Cynthia pod dayon ang modason o mohulip. Magbise si Chonse kon si Cynthia ang mayor. Hangtod nga miabot gyud ang ilang dimalas. Karon wanted si Cynthia human malutsi og warrant of arrest sa Sandiganbayan human kini makonbikto sa kasong pagpangawkaw. Naglambigit lang og P1 milyon ang kantidad sa mga materyales alang sa pagayumayum sa ilang munisipyo nga wala gipaagi og public bidding. Apil sa nakonbikto ni Cynthia mao ang mga department heads nga sakop sa Bids and Awards Committee (BAC).
Sus, kon nakurakot nila ang maong kuwarta no, tagpila lang kaha sila? Ang kauwaw nga ilang nahiaguman ug ang posibleng pagkabilanggo kanila og lima ngadto sa napulo ka tuig, dili ikabugti sa maong kantidad. Gawas niining pagkakonbikto ni Cynthia, gi- dismiss usab siya uban ni Chonse sa Ombudsman gumikan gihapon sa kasong pagpangawkaw. Ang maong kaso nagagumikan sa giorder nila nga pagkaon sa usa ka kalihukan sa lungsod didto sa bakery nga gipanagiya ra usab ni Cynthia. Pastilan paita no, pan ray hinungdan.
Kining maong kaso magsilbi usab kining leksiyon sa ubang mga opisyal nga dili paburan ang ilang negosyo sa ilang lungsod kay mahimong conflict of interest. Apan marukoy kaayo si Mayor Chonse Moreno, wala na niya kuwestiyona ang dismissal order sa Ombudsman ug niresign hinuon. Kining resignation ni Chonse dunay tumong. Iyang gipreempt ang pagserve sa dismissal order aron makadagan pa siya sa umaabot nga eleksiyon. Nabutang sa dismissal order nga gididan na siya makahawid og posisyon sa gobiyerno sa tibuok niyang kinabuhi. Apan inig abot sa panahon nga modagan gihapon siya, makarason man siya nga wala siya madismiss kon dili miresign siya.