To live with you
(Ikatulo sa pito ka mga gula) WA
gyud nako kalikayi nga mobaitg kakulba. Kinsa man say di mobati sa ingon ani bi? Si Pamela nga dunay dakong gusto kang Greg nagpuyo na sa gipuy-an sa akong boyfriend?
“Nganong naingon man ana, Greg? Misugot sab uroy, no, ang mga ginikanan ni Pamela nga anha kini sa inyo mopuyo uban nimo?” Morag gusto kong mohilak.
Gibati ko ang hilom nga pangabubho. Unsaon, seguradong magkasuod gyud sila si Greg ug si Pamela kay kada adlaw na man sila magkita. Ug siyempre, magkadungan sab sila sa pagkaon, ug magkaestoryahay kanunay.
“Gipabakasyon man gud ang Mama ug Papa ni Pamela sa London. Tua man magtrabaho ang maguwang ni Pamela didto. Wa man kunoy laing kabinlan si Pamela gawas nila ni Lolo ug Lola. Puwerte baya nilang suora kay magkasosyo man sila sa ilang negosyo nga buy and sell. Nuon, one month ra man sila didto sa London. Inig balik nila dinhi sa Cebu, mobalik na sab og puyo si Pamela sa ilang ba’ay.”
One month ra bitaw. Apan daghan na ang mahitabo ani between nimo, Greg, ug ni Pamela? Apan wa ko kini isulti sa akong boyfriend. Diha ra kini sa akong hunahuna. Naghunahuna man gud ko ron nga morag nagkasabot ang mga ginikanan ni Pamela ug ang mga apohan ni Greg nga anha gyud sa ila papuy-a si Pamela. Ug sa ingon magkasuod gyud sila si Greg ug si Pamela. Klaro na, uy, nga nakagusto ang parents ni Pamela kang Greg para sa ilang anak?
“So, nganong naguol ka man nga anha sa inyo mopuyo si Pamela uban nimo, Greg?” Gusto kong klaruhon ang gibati sa akong boyfriend pinaagi sa iyang reaksyon.
“Kuan man gud, gusto lang nakong ipakita nimo nga wa ko makagusto ani.”
Mikatawa kunohay ko. Gipakita ko kang Greg nga wa ko maghunahuna ug daotan sa ilang panag=uban og puyo ni Pamela.
“Don’t worry, Greg. I trust you. Ayaw kaguol, uy. Love man gyud kaha ko nimo? Di man gyud kaha ka matental sa kaguwapa ug kaseksi ni Pamela?”
“God knows how much I love you, Carmie. Yes. Di ko magpatental ni Pamela.”
Ning higayona mipahiyom na si Greg. Malipayon na siya. Miyangu-yango ko. Duna man koy pagsalig sa akong trato ba. Apan di ko lang gyud kalikayan nga mobati ko og hilom nga kabalaka. Tawo lang si Greg. Ang tawo huyang ra ba gyud kon kanunay sunud-sunuron sa tentasyon.