Mga pamaagi sa pagpamaligya sa internet

DAGHAN na karong nanggawas nga mga online shopping sites sama sa Carousell, Shoppe PH, Lazada, OLX, ug uban pa, sa internet. Gawas sa nahisgutan nga mga online shopping sites, mamahimo sab mamaligya sa Facebook ug Instagram.

Gawas sa pagbaligya og brand new items, adunay uban nga mamaligya sab og mga ginamit na nga mga butang nga dili na nila magamit apan mamahimo pang mapahimuslan sa uban sama sa sinina, sapatos, cellphone, mga gamit sa panimalay ug uban pa.

Gawas sa makakwarta na ka, makuha-kuhaan sab ang pagpundok sa mga gamit nga di na nimo kinahanglan sa inyong panimalay. Diay lima ka paagi sa pagpamaligya sa online:

1. Tapoka ang mga butang nga dili na nimo gamiton.

Kon andam ka na mobuhi sa butang nga dugay na nimong gihipos o sa maong butang nga dugay na nga nagtipun-og sa inyong panimalay, tapoka kini aron mabaligya. Siguroha nga dili na nimo kini gamiton aron malikayan ang pagmahay.

2. Kuhai og tarong nga picture ang maong butang nga ibaligya aron mas presentable.

Importante ang nindot nga pagka-picture sa gamit nga ibaligya aron mas presentable kini tan-awon sa mga mamalitay. Hunahunaa nga kon ikaw ang naa sa lugar sa kustomer, maengganyo ba ka sa pagpalit sa maong butang kon tan-awon lang ang picture.

3. Hibaw-a unsay mga makitang depekto o mga apan sa butang nga ibaligya ug ipahibawo kini sa kustomer.

Importante sab nga kahibaw ka unsay depekto sa butang nga imong baligya kay aron mahibaw-an sab sa interesado nga kustomer ang depekto ini sama sa naay garas, naay gisi apan maayo pa, nawala ang butones, ug uban pa. Hunahunaa nga kon mapalit kini sa kustomer ug diha na niya nahibaw-an nga adunay depekto ang imong baligya, posibleng masuko ang kustomer nimo.

4. Saktong pagpresyo

Kon ginamit na, mas maayo kon imong minos-minosan ang presyo ini sa original price sa imong pagpalit. Ang saktong pagpresyo ini nagdepende sa gidugayon sa butang nga gigamit, sa depekto o apan ini (kon naa man gani), ang kondisyon sa maong butang ug ang original price. Ipresyo kini og sakto alang sa butang nga ibaligya aron mas daling mahalin.

5. Ibutang ang kompleto nga detalye sa higayon nga imo kini ipost online

Importante sab ang pagbutang sa kompletong detalye ini sa higayon nga i-post na kini online aron mas dali kining mabasa sa mga interesado nga kustomer.