TOM BABAG SA PLANTA
KAY SUPAK USAB SILA SI CABRERA, DIZON
PABOR. Kon sa miaging semana nagrali ang mga tawo nga supak sa pagtukod sa 300-megawatt coal fired power plant sa Brgy. Sawang Calero, ang mga tawo nga pabor usab sa pagtukod sa planta nagtapok kagahapon atubangan sa Ludo Power Corp. Mingpadayag sila sa ilang dakong pag-uyon.
Gatusan ka mga lumolupyo gikan sa lima ka mga barangay ang nagpakita sa ilang pwersa kagahapon isip pabor sa katukoran sa 300-megawatt coal fired thermal power plant sa Ludo Power Corp. sa Barangay Sawang Calero.
Ang mga residente gikan sa mga Barangay Suba, Pasil, Sawang Calero, Pahina San Nicolas ug Duljo Fatima, nagmartsa kagahapon sa buntag ug nagbitbit og mga placards nga adunay markang “Yes to progress, yes to coal," "Coal fired power plant: isipin ninyo ang mga trabahong maibigay ng planta ng coal” ug uban pang benepisyo.
Way mga opisyal sa Ludo Corp. ug presensiya sa mga barangay kapitan ang nikuyog sa panon sa mga raliyesta atol sa ilang gitawag og show of force.
Gipadayag sa mga residente nga nagkasabot sila nga maghiusa aron tubagon ang gipahigayon nga mini-rally niadtong Biyernes sa nagkadaiyang mga organisasyon nga supak sa pagpabarog sa planta tungod sa hulga sa kalikupan ug panglawas.
Si Lucille Dacua, 57, usa sa gatusan ka mga tawo nga niapil sa rally pabor sa planta.
“Labaw pas pabor kay dugay na ming nagpuyo diri gikan pa sa akong pagkatawo, naa na ang Ludo. Wa gyuy nahitabo ug walay naunsa nga mga tawo. Unya nganong mosupak man ta nga mohatag man sila og kaayuhan?,” matod ni Dacua.
Si Arlene Gijan nidason usab sa pamahayag ni Dacua.
“Kami uyon lang gyud mi nga matukod ang planta. Kani nagpakita nga uyon gyud mi kay nakahibalo man mi og unsay benepisyo nga mahatag sa planta ngadto sa barangay,” paghulagway niya.
Si Mayor Tomas Osmeña, sa iyang bahin, nagkanayon nga uyon unta siya kon 30 megawatt lang ang planta sa Ludo.
Apan nakasabot siya nga kinahanglan usab nga pahimuslan sa kompaniya ang ilang luna hinungdan nga naumol ang 300 megawatt.
Gipadayag sa mayor nga supak ang iyang mga sinaligan sa environment nga silang Nida Cabrera ug Alvin Dizon hinungdan nga supak usab siya.