OSMEÑA GISAWAY NI DINO
Si Presidential Assistant for the Visayas Michael Dino niingon nga ang plano nila ni Cebu City Mayor Tomas Osmeña ug Filinvest sa pagbakwi sa pagbaligya sa 19 hektaryas nga luna sa South Road Properties (SRP) makapaalarma.
Dugang niya nga ang Siyudad di na business-friendly tungod niini.
Reaksyon kini ni Dino sa pahibawo ni Osmeña sa miaging adlaw nga gihikay na nila sa FLI management ang pagbakwi sa kontrata.
Ila na lang gihikay ang gikinahanglang legal nga mga lakang sa ilang plano sa pagbakwi sa pagpalit sa luna niadtong 2015, butyag sa mayor.
Hinuon iagi pa kini niya sa Konseho, apan andam siya nga mopasabot sa mga konsehal.
Gihulagway ni Dino si Osmeña nga madaugdaugon human gukda sa mayor ang dagkong mga investor.
“Definitely, he is a bully,” sulti ni Dino sa mga reporter.
Matod niya nga kini makaguol ug makahadlok tungod kay nakapagubot kini sa business sector.
Iyang gitumbok ang SM nga duna untay daghang mga plano apan wa pa gipatuman.
Ang SM usa sa mga gikwestyon ni Osmena sa iyang pag-sumer sa katungdanan kay usa sa mga nakapalit og lote sa South Road Properties.
“Remember, SM supposed to build an arena which we badly need, built hotels, commercial areas at the same time, housing projects but everything was put on hold,” nagkanayon si Dino. / SunStar Cebu