9 BALAY NAUGDAW SA SUNOG

Siyam ka panimalay ang naugdaw ug duha ang partially burned sa duha ka sunog nga miigo sa Barangay Cogon Pardo ug Barangay Guadalupe kagahapon ug sa milabayng gabii.

Illegal tapping ug mibuto nga ceiling fan o charger ang gisubay sa kabomberohan nga posibling sinugdanan.

Ang unang alarma nadawat alas 7:53 sa gabii sa Sityo All Season, Barangay Cogon Pardo.

Ang sunog didto magsugod sa balay ni Elvira Bilarao.

Matud pa ni SFO2 Dionesio Regasa nga iyang nakita ang mga kutay sa kuryente nga nagsanga-sanga sa dapit.

Nadungog sa mga tawo ang pagpiti-piti sa kuryente sa wa pa moulbo ang kayo nga miugdaw og lima ka balay, mibilin og danyos nga P20,000.

Samtang pagka alas 12:03 sa udto kagahapon naalarma ang sunog sa eskina V. Rama ug dan Bacayo, Barangay Guadalupe.

Ang nasunog ug naugdaw mao ang balay ni Jake Hubahib ug miugdaw pa sa laing tulo ka balay sa silinganan, duha ang partial.

Matod ni SFO1 Emilliano Dano nga way tawo ang balay ni Hubahib, ang iyang kaipon nga si Mary Grace Nabua milakaw kay gahatud og pagkaon sa ilang anak sa tunghaan, gitawagan kini sa silingan ug gipahibawo.

May impormasyon ang kabomberohan nga nalimtan og ibot nga charger o nalimtan og pawong nga ceiling fan ang sinugdanan.

Matud ni Nabua nga dala niya iyang charger ug miangkon nga ceiling fan nga baratuhon ilang gamit, apan iya usab kining naibot.

Ang sunog miugdaw og upat ka balay ug duha ang nakan-an, may danyos nga P75,000.