Pagtukod sa drug rehab di mahinayon
Di madayon ang pagtukod sa ikaduha nga Mega Drug Rehab Facility sa lungsod sa Carmen, Bohol. Giplano kini nga tukoron unta sa lungsod, human buksi ang unang Mega Drug Rehab Facility sa Fort Magsaysay, Nueva Ecija kaniadtong Nobiyembre sa miaging tuig. Ang drug rehab facility sa Nueva Ecija donasyon sa bilyonaryong Insik nga si Huang Rulun og makaserbisyo sa 10,000 ka mga pasyente nga nabiktima sa drugas. Ang donasyon nga P1.4 bilyones ni Huang makahimo og duha ka susamang gidak-on nga rehab center og iyang gihimo isip tabang sa administrasyong Duterte sa pagsumpo sa drugas.
Matod ni Cabinet Secretary Jun Evasco, adto ipatindog ang ikaduhang Mega Drug Rehab Facility sud sa Ubay Stock Farm sa lungsod sa Ubay, Bohol. Nahimo ang desisyon human nila bisitaha uban sa mga negosyanteng Insik ang Ubay Stock Farm. Dako og epekto ang pagtukod sa mega rehab facility sanglit maapil man paguswag ang Ubay Stock Farm. Maanindot na unya ang mga kadalanan sa stock farm ug magamit sab ang mga pasyente sa pag-ugmad sa basakan isip pag-usab sa ilang naandang buhat, matod pa ni Evasco. Wa hinuon mosulti si Evasco og kanus-a sugdi ang pagtukod sa mega drug rehab facility.
Dako ang kasuko sa mga Bol-anon sa linuog nga pagbanhig og pagluthang ni Manlalaban Mia Manuelita Mascarinas-Green kaniadtong miaging Miyerkules nga miresulta sa pagkamatay niini. Gihimo ang salaod atubangan sa iyang tulo ka mga anak ug yaya. Human paulani og bala si Mia, giablihan pa sa mga kriminal ang pultahan ug gisusi og patay na ba kini. Gitionan pa ang yaya sa ulo niini apan gipakgang sila sa kinamaguwangan nga anak ni Mia ug wa madayon ang plano sa kriminal. Di masukod ang kasakit sa pamilya ni Mia, labi na ang bana niini nga si Estong Green.
Lisod sabton ang pagpusil kaniya. Matod pa sa balita, dunay kalabotan sa kaso ang pagluthang. Kon tinuod kini, nganong si Mia nga abogado man ang pahimungtan sa napildi sa kaso? Trabaho lang ni Mia ang paglaban sa midaog og kon dunay angay panimaslan sa napildi, kini way lain kondi ang nagkiha kaniya ug di ang abogado nga igo lang milaban.
Sakit man hunahunaon apan ang iyang kamatayon nakatakda na nga mahitabo. Dunay daghang hinungdan nganong di kini mahitabo. Mahimong di siya moagi sa lugar, mahimo nga di siya mosakay sa maong awto ug magpakuyog og lain nga kauban og daghan pa nga mga hinungdan. Apan didto siya moagi sa naandan niyang agianan mao nga nasundan siya sa mga kriminal ug nahimo ang pagpusil niini.
Matod pa sa mga balita, gusto makigsulti si Cong. Art Yap kang Cong. Aris Aumentado aron paghangyo niini nga di lang padaganon pagka-gobernador sa sunod eleksiyon.