Unsay naa sa SRP?

Way bisan usa nga angay moangkon nga "personal nga gipanag-iya" ang South Road Properties (SRP). Ang mga opisyal nga instrumento nga nakapahimo sa SRP o bisan usang proyekto sa dakbayan dili mapangangkon nga iya kini apan responsibilidad niya ang pagplano ug pagpatuman sa kalamboan sa dakbayan isip nagpapiling suluguon sa publiko ug gisuweldohan gikan sa buhis sa katawhan. Sa pikas bahin, dungog ug garbo nga napili.

Bahin sa SRP, nganong init kini kaayo? Katingalahan ang gipakita nga pagtagad sa pipila ka opisyal nga sama sa personal na kaayo?

Sukad sa panahon ni kanhi mayor Alvin Garcia ngadto sa adminisitrasyon ni kanhi mayor Mickael Rama, si Osmeña nipakita sa iyang talagsaong kainit sa isyu sa SRP gikan sa pagbaligya ug pagdapit og mamuhonan sa dapit.

Naoberbahan nga sama sa gipugngan sa pagbaligya sa luna sa ubang nangaging lider sa dakbayan gawas lang niya? Apan, si Rama nakalusot hinungdan sa pagsugod sa kalamboan karon sa halapad na reklamasyon.

Apan karong nabalik na si Osmeña sa puwesto, ang SRP sentro ug dugukan gihapon sa iyang pagpakabana ug kaguliyang human ang mayoriya sa konseho dili sakop sa Bando Osmeña Pundok Kauswagan (BOPK) busa dili maglahuslahos ang gusto nga mahimo sa mayor.

Gikuwesityon ug giugkat ang mga kontrata sa kasamtangang namuhonan sa SRP. Hinuon, kini makaayo sa katawhan apan dili kinahanglan nga moabot sa punto makapawong ang pagsugod sa kalamboan sa dapit aron dili mahisama sa unang North Reclamation nga dugay ang paglambo ug walay maayo plano.

Sa kainit ug kaikag ni Osmeña bahin sa SRP gikan sa panahon ni Garcia, Rama momugna kini og pangutana, unsay dakong benepisyo nga makuha sa pagsira og kontata sa SRP? Ipatigbabaw ninyo ang interes sa publiko tali sa personal nga kaayohan.