To live with you
Misamot ang akong kalagot kay nagsige lag kiring ang selpon ni Greg. Wa gyud niya tubaga. Hain man kaha ron siya? Wa ko kalikayi nga kulbaan. Nagkuyog tingali ron sila si Pamela. Nanuroy tingali sila. Nag- date tingali sila. Nanan-aw tingali silag sine. Bisan unsa na lang ang nasulod sa akong hunahuna.
Gihunong ko na lang ang pagtawag sa akong boyfriend. Nagduda gyud ko. Duna gyuy gihimong milagro sila si Greg ug si Pamela. Duna gyuy gitago si Greg nako. Di gyud ko mahimong masayop. Samtang naghunahuna ko ani, mitulo gyud ang akong mga luha.
Wa ko ganahing mikaon sa pagpanihapon namo. Misulod dayon ko sa akong kuwarto. Gitawgan kog usab si Greg. Nakaginhawa kog luag dihang mitubag na ang akong boyfriend.
“Ganina ra kong nagsigeg tawag nimo, uy. Pero wa ka man motubag. Diin ka man diay?” Wa ko makapugong sa akong kaugalingon. Nataas ang akong tingog. Gusto kong ipabatyag sa kong trato nga naglagot ko.
“Naligo tingali ko sa imong pagtawag, Carmie. Wa man gud nako hilnga ang akong selpon. Wa ko makahibawo nga nanawag diay ka.”
Nahilom ko. Morag dunay rason si Greg. Naligo diay siya ganina. Apan duna koy gustong mahibaw-an kon matinud-anon ba gyud siya nako.
“Aw, sorry nga napatas-an tika sa akong tingog, ha, Greg. Nakahibawo ka na bitaw nga dali ra kong mingawon nimo. Tuod diay, diin ka man mamahaw ganina?”
Mikusog pagkuba ang akong dughan. Unsa kaha kon mamakak si Greg nako? Mosalig pa ba kaha ko niya? Di kaha tinuod ang akong pagduda nga duna silay milagrong gibuhat si Pamela? “Ah, sa eskol, Carmie. Sa
canteen. Kuan man gud, wa ko ganahing mamahaw kay busog pa ko. Ug si Pamela sab, wa mokaon. Mihangyo siya nako nga magdungan mig pamahaw sa eskol. Nagkita mi sa eskuwelahan ganina. Nagdungan mig pamahaw. Kay ngano man diay, Carmie.”
Nawala ang gibati kong kakulba. Matinud-anon gyud diay si Greg nako. Gitug-anan ko niya sa tinuod. Hilom kong nakapahiyom. Wa na koy pagduda sa kamatinud-anon ni Greg nako.
“Aw, mao man kaha. Nag-unsa ka man ron sa inyo, Greg?”
“Nia ko sa akong kuwarto. Nagbasa-basag pocketbook. Mao ra man kini ang akong kalingawan. Pagwa’a sa kalaay ba. Ikaw, nag-unsa ka man ron diha?”
“Nia sab ko sa akong kuwarto, Greg.”
Nahunong lang ang among pag-estoryahay ni Greg dihang nahutdan na kog load. Nakatulog ko nga malinawon ang akong hunahuna. (TAPUSON SUNOD GULA)