Grupo mosimpatiya sa welga sa mga sakop sa Piston
MISIMPATIYA ang National Confederation of Transportworkers Unity sa katuyoan sa Pinagkaisang Samahan ng mga Tsuper at Opereytor Nationwide (Piston) nga nagplano magprotesta karong Lunes batok sa pagphaseout sa mga PUJ. Apan matod ni Romeo Armamento, national vice president sa NCTU Visayas, nga karon pang Sabado sila mohukom kon moapil ba sila sa protesta pinaagi sa dili pagbiyahe ug pagpamasahero.
Siya nipasidaan nga kon makadesidir sila nga dili mamasahero segurado nga maapektuhan ang dagan sa transportasyon sa Sugbo ug daghang mga pasahero ang matanggong sa Lunes.
“Basta if molihok mi kinahanglan gyud mangandam sila (gobiyerno),” pahayag ni Armamento sa pakighinabi sa Superbalita Cebu kagahapon.
Siya nibanabana nga moabot sa 2,500 ang mga miyembro sa ilang grupo nga gilangkuban og mga drayber sa
public utility jeepney, trisikol, multicab ug habalhabal. Kasagaran sa ilang mga sakop nagbiyahian sa mga siyudad sa Lapu-Lapu ug Mandaue hangtod sa Danao sa norte ug gikan sa dakbayan sa Tabunok, Talisay; Naga hangtod sa lungsod sa Sibonga sa habagatan.