PBB sa mga maestra sa Talisay City madawat na

Madawat na sa mga magtutudlo sa dakbayan sa Talisay ang ilang gipaabot nga Performance Base Bonus (PBB).

Matod ni Talisay City Schools Division Supt. Leah Noveras nga ugmang adlawa na kini madawat sa tanang mga magtutudlo sa pambulikong tunghaan.

Naandan nga madawat unta kini sa matag Enero.

Apan karong tuiga nalangan kini tungod sa pagsiguro sa mga dokumento nga ipadala pa sa ilang rehiyonal nga buhatan.

Si Noveras nibutyag nga ang labing taas nga madawat sa mga magtutudlo P35,000 samtang P5,000 ang labing ubos.

Si Noveras miingon nga dili kini magparihas tungod kay magdependi kini sa grado sa mga tunghaan. Matod niya nga sa iyang

division ang labing dako nga madawat mao ang P20,000 sa mga magtutudlo sa Talisay Science High School samtang ang uban makadawat nalang og tag P10 mil.

Hinuon kadaghanan niini tag P5,000.

Iyang gipasabot nga magdependi o magbase usab kini sa performance sa mga tunghaan sama sa National Achievement Test, paghatag og subay sa ilang pundo nga gihatag matag tunghaan ug uban pa.

Si Noveras miingon nga ugmang adlawa madawat na sa mga magtutudlo ang ilang PBB sanglit ila naman kining isulod sa ilang mga ATM card.