Sistema sa hustisya angay una palig-unon: Magpale

Alang ni Bise Gob. Agnes Magpale, mas maayong palig-unon una ang kinatibuk-ang sistema sa hustisya dinhi sa nasod, sa dili pa amendahan ang pipila ka mga existing nga balaod sama sa Juvenile Justice and Welfare Act ug sa dili pa usab hingpit nga banhawon ang death penalty.

Si Magpale, supak sa subling pagpatuman sa silot kamatayon ug sa tinguhang pagpaubos sa edad sa criminal liability.

Giangkon ni Magpale, nga usa siya sa mga opisyal nga nisuporta kaniadto sa panawagan nga us-osan ang edad sa criminal liability sa kabataan, gikan 15 anyos ngadto sa 9 anyos. Apan karon, gihulagway niya nga nihimo siya ug “complete turn” aron pagsupak na niini.

Sigun sa opisyal, nakasabot na siya ug ang Provincial Council for the Welfare of Children kon nganong dili kini angayang buhaton sa mga menor de edad.

Matod niya, dili kini makatabang sa pag- promote sa kaayohan sa kabataan dinhi sa nasod.

Duna nay giduso nga balaudnon sa Kongreso alang sa gitinguha nga pag-us-os sa criminal liability dinhi sa nasod. Ang PCWC supak niini.