Rape wa sa death penalty?

Daghang kilay ang miisa sa dihang ang Kongreso mipahibawo nga ubos sa balaudnon nga mahibalik ang silot nga kamatayon o death penalty, dili iapil ang kasong plunder. Mitumaw na hinuon ang pagduda nga posibling aduna kini silay plano nga mangurakot kay ila na mang gitapin-an daan ang ilang kaugalingon.

Sa orihinal nilang sugyot, ilang giila ang 21 ka mga kaso nga posibling, kon mapamatud-an, masilotan sa kamatayon pinaagi sa lethal injection, firing squad o kaha bitayon.

Lakip niini mao ang plunder, treason, qualified piracy, murder, rape, kidnapping, serious illegal detention, ug kadtong makalapas sa pagpayuhot og gidiling drugas.

Pero sa panagtagbo sa mayoriya sa Kongreso, ilang gisuwayan pagsalikway ang plunder case nga malakip sa death penalty. Tungod sa mga pagsaway sa kadaghanan ilabi na pinaagi sa social media, dali nilang gibakwi ug giusab ang ilang baruganan. Ang kasong plunder uban sa kasong treason o pagtraydor sa nasod ug kasong may kalabutan sa gidiling drugas, usa na sa tulo nga masilotan sa silot kamatayon. Mao na lang ni nahabilin sa 21 nilang orihinal nga gisugyot.

Pero ang makasurprisa, kay hasta ang kasong rape giapil sa pagtangtang.

Lab-as pa sa atong panumdoman, ang upat pa ka buwan nga bata ang gilugos sa way puangod nga suspek sa syudad sa Carcar. Kini gawas lang sa uban pang nabiktima sa maong linuog nga salaod.

Sa iyang Facebook account, ang Sugboanong kongresista nga si Samsam Gullas mipahibawo nga mipalabang na siya og balaudnon nga iapil ang rape sa death sentence.

Anaa na kini sa ikaduhang pagbasa sa Kongreso. Hinaot nga mabuligan unta ang maong balaudnon ni Gullas nga nagpakabana sa kaluwasan sa kababayen-an.