Koryano

Korean Mafia,” mikalit og yawyaw akong amiga, morag gialimongawan, dayon mipiyong og balik. Di ko sweto aning giingon nilag Korean Mafia ug kon tinuod ba gyod ni, mao nga wa na lang ko mitubay.

Naglagot na gyod ko aning mga batan-on ron, hilig kaayog Koryano,” nagyawyaw akong amiga kausa nga nagtagay mi sa eskina.

“Ilang music Koryano, ilang mga idol nga artista Koryano, ilang sinul-oban Koryano. Nangandoy pud tingali ning mga bataa nga maminyog Koryano,” yawyaw pa niya, dayong yarok sa iyang tagay.

Nakasabot ko sa akong amiga. Nanaghan na pag-ayo ang mga Koryano sa atong syudad nga di na nato malimod ang ilang impluwensya sa atong kinabuhi, labi na sa mga batan-on.

Di pa ni dugay. Dili ing-ani kadaghan ang mga Koryano sa Sugbo kaniadto. Sa among panahon sa dekada 80 ug 90, mga Hapon ang naghitak sa atong syudad ug probinsya.

Di masipyat matag usa namo kaniadto adunay kaila, silingan o paryente nga nakatrabaho sa Japan kay nakauyab, nakabana o nakabunal og Hapon. Ug kinsa namo ang wa kadungog sa gitawag og Japayuki kaniadto? Apan ambot unsang pagkaunsaa nga naghinay-hinay og panguli ang mga Hapon, ug mipuli ang mga Koryano.

Dako sab og impluwensya ang mga Hapon sa among kultura isip mga bata kaniadto. Kinsa namo ang wa kasag-o sa lyrics sa theme song sa Voltes V? Susama ra gihapon ang nahitabo karon sa pagdagsa sa mga Koryano. Mas paspas lang ang pagtubo sa ilang impluwensya tungod sa social media.

“Unsa may nakalagot ana?” akong gipangutana akong amiga. “Ah, basta, samok,” ingon siya.

Wa na lang nako siya pugsa kay morag hubog na ra ba. Wa na lang nako siya ingna nga positibo akong pagdawat ining pagdagsa sa mga Koryano sa atoa. Nakita tingali nila nga malinawon puy-an ang atong syudad.

“Korean Mafia,” mikalit og yawyaw akong amiga, morag gialimongawan, dayon mipiyong og balik. Di ko sweto aning giingon nilag Korean Mafia ug kon tinuod ba gyod ni, mao nga wa na lang ko mitubay.

Ang akong gibuhat misyagit kog “Menudo!”

“OMG, mabuang gyod ko atong Menudo sa una,” mitubag akong amiga nga nagpiyong gihapon.

“Kato silang Ricky Martin, mao to silay imong mga Koryano kaniadto,” ako siyang giingnan. Pero wa na siya kadungog kay dali kaayong nakahagok ang kanahan.