Pangutana bahin sa human trafficking

Dear Atty Joan,

Hello, Atty Joan, tawaga lang ko sa pangalang Miss Philippines.

Sikat kaayo tong babaye nga nadakpan sa Malapascua tungod kuno sa trafficking? Unsa diay na ang trafficking, Atty. Joan? Pirmi lagi ko makadungog ana pero murag di kaayo ko sigurado unsa gyud ang buot pasabot ana. Unsa diay na, Attorney? Miss Philippines Dear Miss Philippines,

Ang trafficking o mamahimo natong matawag og pagbaligya og tawo kay usa ka krimen ilawom sa Republic Act 9208 RA 9208) nga gi-amendahan sa Republic Act 10364 (RA 10364). Para dali kini masabtan, timannga ang trapiking, sama sa ubang mga krimen, muresulta lamang kon naa ang tanan nga elemento niini:

Ang trapiking ang akto sa pag-rekrut, pagbiyahe, pagbalhin, pagtago, paghatag, pagdawat, pagpailaila aron mahimong kapikas sa kinabuhi, o pagtanyag ug pagminyo, pagmintinar, pag-alima, pagsagop og tawo o bata, pinaagi sa pagpanghulga, paggamit og kusog, pagdagit, pagpangilad o panglimbong, pag-abuso sa gahum o posisyon, pagpahimulos sa kahuyang sa biktima, o paghatag o pagdawat og benepisyo aron makuha ang pag-uyon sa biktima.

Para mahulog nga trapiking, kaning mga akto ug paagi nga nakalista sa balaod kay gipamuhat alang sa mga tumong sama, pero dili limitado lamang, sa prositusyon o lainlaing pang claseng pagpahimulos nga sekswal.

Naglakip kini sa cybersex o pornograpiya, pinugos nga pagpatrabaho, pagpaulipon, pagtangtang ug pagbaligya sa parte sa lawas, pagpalambigit sa biktima sa armadong kusog,

drug trafficking, ug uban pang mga iligal nga binuhatan nga may puruhan nga makadaot sa kaayo, seguridad ug moralidad sa batan-ong biktima.

Kon aduna ang tulo ka elemento, makaingon kita ng trapiking ang nabuhat nga krimen. Pero, importante nga atong timan-an nga kon ang biktima kay usa ka bata, dili kinahanglan nga gihulga, gigamitan og kusog o giilad sila usa kini makonsiderar nga trapiking.

Kon ang biktima bata, kinahanglan lang ipakita nga aduna ang elemento sa akto ug tumong, bisan pa ug dili maipakita nga gigamit ang paagi nga nakalista sa balaod.

-Atty Joan