AHAS ANDAM SA TAHAS
Sa ikaduha pa lang niyang away sukad sa iyang pagsaka sa flyweight division, mohamag na dayon og world
title fight ang 2-division world boxing champion nga si Donnie Nietes.
Andam na ba ang gitawag og “Ahas” ning maong malisod nga tahas? Mitubag ang longest reigning Filipino world champion nga dugay ra siyang andam.
Kasamtangang No. 3 ranked sa International Boxing Fedetation (IBF) flyweight division, si Nietes makigharong kang Thai Eaktawan Mor Krungthep Thonburi, ranked No.4, alang sa inilugay sa bakanteng IBF world flyweight title karong Abril 29 dinhi sa Sugbo.
Ang away maoy main event sa ika-40 nga edisyon sa nabantog nga Pinoy Pride. Sa premiro niyang away sa
flyweight division, si Nietes, kinsa kanhi minimumweight ug jr. flyweight world champion, midaog batok kang Edgar Sosa sa Stubhub Center, Carson California pinaagi sab sa unanimous decision.
Gipasabot ni Nietes nga nagpanikad na siyang moaway og
world title sa bag-o niyang timbang ug mapasalamaton siya sa iyang promoter nga gihatagan siya ning maong oportunidad.
Ang kadaugan ni Nietes sa umaabot niyang tahas makabutang kaniya sa han-ay kauban sila si 8-division world
champion Manny Pacquiao ug 5-division world champion Nonito Donaire isip mga Pinoyng boksidor nga adunay world titles sa tulo ka managlahing weight division.
Gipasabot ni Nietes nga human sa iyang kadaugan batok kang Sosa, kinsa usa sa dekalidad nga mga boksidor sa kalibutan sa flyweight division, nakasulti na siya sa iyang kaugalingon nga andam na siya alang ning bag-o niyang tahas.
Nagkanayon si Nietes nga niadto pa lang Enero, nagsugod na siya og training gumikan kay sayod siyang dili bastabasta nga kontra ang Thai fighters.
Giklaro ni Nietes nga iyang buhian ang tanan niyang makaya alang ning awaya aron makaabli og pultahan alang sa
iyang pangandoy nga makabaton og world unification bout sa flyweight division.
Sa undercard sa Pinoy Pride 40, mopakita og aksyon ang
stablemates ni Nietes nga sila si Mark “Magnifico” Magsayo ug Jeo “Santino” Santisima batok sa lainlaing kontra.