IBALIK ANG ‘MAHIKA’
Ning panahon nga gisagubang sa Los Angeles Lakers ang labing ngil-ad nga kasinatian sa ilang kasaysayan, ang tag-iya sa team nga si Jeanie Buss midangop kang basketball legend Magic Johnson.
Ning maong lakang, nanghinaot ang Lakers nga mahibalik ang ‘mahika’ nga naghatag kanila og daghang mga titulo sa National Basketball Association (NBA) kaniadto.
Gitangtang ni Jeanie ang iya mismong igsuon nga Jim Buss isip executive vice president of basketball operations lakip na si general manager Mitch Kupchak.
Gitugyan niya ang tahas sa pagpalig-on og balik sa puwersa sa Lakers ngadto kang Johnson, kinsa kanhi sinaligang pointguard sa multi-titled squad. Si Jim nagpabiling stakeholder sa Lakers apan si Jeanie maoy adunay pinal nga desisyon basi sa kabilin sa ilang amahan nga si anhing Jerry Buss.
Sa kasamtangan, ang Lakers naggunit og 19-39 nga rekord ug gituohang sa ikaupat nga sunodsunod nga tuig, dili na sab sila makasulod sa playoffs nga labing una unyang mahitabo
sa ilang kasaysayan.
“It was such a hard to decision to make, that I probably waited too long,” batbat ni Jeanie. “For that, I apologize to Laker fans. Now, with clarity and direction, and after talking with Earvin, a change was needed.” Dul-an sa tulo ka mga semana human niya gikuha og balik si Johnson aron itugyan ang executive role, nakahukom si Jeanie nga ihatag sab sa Hall of Fame pointguard ang obligasyon isip basketball operations president.
Nagkanayon si Johnson nga iyang ipadaplin ang daghan niyang obligasyon sa nagdaiyang mga negosyo nga iyang gisudlan aron tutokan ang bag-o niyang tahas sa Lakers.
“I’m coming back to an organization that I love,” batbat ni Johnson. “The timing is right. It was time to put aside my businesses and focus on the Lakers’ business.”
Gibutyag ni Johnson nga ang Lakers nahilambigit sab unta sa negusasyon kabahin kang All-Star center DeMarcus Cousins apan wala kini nila nakuha. Si Cousins nabalhin gikan sa Sacramento Kings ngadto sa New Orleans Pelicans.
Si Kupchak, kinsa dugay
na’ng nagtrabaho sa Lakers ug maoy GM sa team gikan niadtong tuig 2000, nagpasalamat sa pamilyang Buss.
“I would like to thank the Buss family for 36 incredible years,” matod ni Kupchak.
“In particular, I would like to acknowledge Dr. Buss who brought me here as a player in 1981. I also want to thank every Laker player, coach and staff member with whom I have worked and who supported me through the good times and the very few not so good times.”
Nanghinaot si Kupchak nga magmalampuson og balik ang Lakers ubos sa liderato ni Johnson.