GRUPO NI SABALONES MIBALIK SA DRUGS: PNP

Sabalones drug group nga naglihok sa Talisay City paingon sa syudad sa Carcar mibalik sa ilang illegal nga negosyo human nahunong ang kampanya sa kapulisan sa illegal nga drugas.

Gikompirmar sa hepe sa Cebu Provincial Police Office, Sr. Supt. Eric Noble, nga nibalik sa ilang naandan nga negosyo ang mga gaway sa mga bigtime drug lord sa probinsya sa Sugbo, apil na kang Franz Sabalones.

Matod ni Noble nga ang gaway sa inila nga durugista sa habagatang Sugbo nga matod pa maoy nag control sa Talisay paingon sa syudad sa Carcar nga gitawag og Sabalones drug group mao na usab ang nagpadagan sa illegal nga negosyo ug nangalipay sa dihang di na makadakop ang kapulisan.

Sa iyang impormasyon, nagsadya pa ang maong grupo human giwagtang sa kapulisan ang kampanya sa illegal nga drugas apan mao na kini karon ang ilang sumpuon ug target sa sunod nga anti drug campaign sa kapulisan.

“Even the group of Sabalones, I read many reports, intel report, na sa Talisay nagbalikan, San Fernando lalo na, nagsaya daw sila kase ang pulis nga hindi nga daw makahuli,” matod ni Noble. Makigtagbo usab si Noble sa hepe sa Danao City police station tungod sa report nga nilig-on ang grupo ni Alvaro Alvaro alyas Barok aron ilang mahatagan og sulosyon.

Una nang mitug-an ang Philippine Drug Enforcement Agency (PDEA) 7 nga dunay bag-ong sinaligan si Barok nga maoy nagpadagan sa illegal drug trade niini sa norte.