Dili makaseguro ang PRO-7 nga way mamatay nga durugista

Di kapasalig ang Police Regional Office 7 nga way mamatay sa mga durugista ning pagbalik na sa ilang anti drug operation bisan kon nanawagan ang religious sector nga likayan lang una ang patay ning pagtimaan sa kwarisma.

Matod ni Chief. Supt. Noli Taliño nga kon mosukol ang mga target sa ilang operasyon mamatay kini sanglit di siya makatugot nga ang police maoy maunhan.

Iyang gipasabot nga ang pangutok sa mga lulong na sa illegal nga drugas wa na kini matuno ug mahimong mopatay kini sa mga awtoridad.

Iya hinuon nga gisaad nga kon ang mga nalambigit sa illegal nga drugas di mopakita ug pagsukol, way mamatay.

“Hindi natin maiiwasan na hindi madugo kasi, itong mga drug pushers and users yung mga high value target ay established illegal business nila ito. So, hindi bastabasta iiwanan ito, yung iba dito ay lalaban,” matod ni Taliño.

Gihan-ay na sa PRO-7 ang bag-ong guidelines sa ilang pagbalik sa anti drug operation atol sa gipatawag nga command conference ni Taliño.

Usa sa mga angayan nga sundon mao ang pagpakig-alayon sa Philippine Drug Enforcement Agency (PDEA_ 7 nga maoy lead agency kon ang kampanya na sa drugas ang hisgutan.

Matod ni Taliño nga sugod sa miaging buntag, mahimo nang makaronda ang kapulisan pinaagi sa abag sa PDEA dungan sa pagparumbo na sa ilang mga high value target.

Sunod semana manghashas na ang kapulisan og sakop nga ihulip sa anti illegal drugs unit diin kadtong way mantsa sa kurapsyon ang ibutang.