Death penalty bill may daghang reaksyon
Pasado sa ikaduhang pagbasa sa ubos balay-balauranan ang balaodnon nga death penalty nga gitinguhang ibalik pagpatuman sa nasod.
Nakaani hinuon og nagkalain-laing reaksiyon ang kalambuan sanglit ang Plunder, Rape ug Treason giwagtang sa mga krimen nga mahimong silotan og kamatayon. Gani managlahi man ang baruganan sa mga City official sa siyudad kalabot sa death penalty.
Si Cebu City Mayor Tomas Osmeña sa iyang bahin mihulagway nga moagi pa og taas nga proseso una mapatuman ang death penalty apan iyang gitataw nga kon mapatuman man kini ilakip ang drugas sa krimen nga pahamtangan sa silot.
Dugang niini nga kon ma-implementar ang death penalty sa nasod mahimo ra nga dunay ammendments nga buhaton.
Gani si Vice Mayor Edgardo Labella di uyon sa death penalty apan kon mapasar kini ug maimplementar hugot kining namahayag nga ang plunder angayan nga ilakip sa mga krimen nga mahimong silotan og kamatayon.
Kay alang niya ang plunder di lang matag individual ang apektado niini apan ang tibuok nasod maong dili siya uyon nga giwagtang ang plunder.
Nasuta nga gawas sa plunder giwagtang usab ang rape nga gihulagway sa bise mayor nga angayan lang gihapon nga iapil sa death penalty.
Nakalatid sa balaodnon nga ang death penalty di angay ipatuman sa mga bata nga nagpangedaron og 18-anyos paubos ug senior citizens nga 70-anyos na dihang iyang nabuhat ang krimen.