Signboardd ibutang sa SRP tunnel

Human sa nahitabong aksidente sa may baba sa tunnel sa South Road Properties (SRP) niadtong Martes diin usa ka bata ang naligsan ug namatay.

Gusto sa Cebu City Government nga pabutangan og dugang signboard ang tunnel ug viaduct.

Kagahapon, nakigtagbo si Cebu City Councilor Dave Tumulak sa Department of Public Works and Highways (DPWH) Cebu City aron mohangyo kini nga butangan og signboard sa daling panahon.

Matod ni Tumulak, kinsa chairman sa Committee on Peace and Order, nga di angay palabangan o palakwan sa tawo ang tunnel ug viaduct.

Matod niya, di usab pwede ang bisikleta sa mga dapit tungod kay dilikado kini.

“Di ta gusto nga masubli pa ang nahitabo niadtong bata,” nagkanayon si Tumulak.

Naobserbaran usab nila nga adunay mga batan-on nga gikan sa Carbon ang mag-dive sa viaduct diin mao usab kini ang gusto pabutangan og signage ni Tumulak nga di kini pwede.

Gialerto na usab niya ang Barangay Tanod sa Ermita, SRP Police, Philippine National Police ug ang DPWH nga kon makakita nga adunay molayat sa dagat gikan sa viaduct nga badlungon kini.

Nisanong niini ang DPWH Cebu City ug matod ni District Engineer Nicomedes Leonor Jr., nga butangan nila og pahibalo ang matag kilid sa tunnel ug viaduct.

Dugang ni Leonor nga di na palakwan ang tunnel apan human sa aksidente ug subay sa hangyo butangan nila kinig dugang signboard.

Ang entrada sa matag tunnel ug viaduct butangan usab.

Gihangyo hinuon ni Tumulak ang publiko nga di moagi sa entrada duol sa tunnel ug ilabi na sa viaduct aron malikayan ang disgrasya.

Gikatakda nga sa di pa mahuman ning buwana mabutang ang mga signage.

“Will try our best before the end of this month kay mag- requisition pa mi sa materials ug mag- canvass pa, usual government procedure. Maayo gani kay karon week palang ning abot na among budget para maintenance,” matod ni Leonor.

Labing una nga aksidente diin nakalas ang kinabuhi sa 4-anyos nga bata human kini maligsi og truck.