Lapu-Lapu City councilor namatay sa komplikasyon sa operasyon
sa edad nga 67, namatay kagahapon sa buntag si Lapu-Lapu City Councilor ug kanhi Cebu Provincial board Member sa 6th district, damian "damgo" Gomez, sa pribadong tambalanan sa dakbayan sa sugbo.
Gikataho nga komplikasyon sa iyang operasyon sa atay maoy hinungdan sa kamatayon sa beteranong pulitiko nga gidala sa tambalanan niadto pang Pebrero 26.
Ang haya ni Gomez anaa sa Saint Peter Chapel sa dakbayan sa Mandaue samtang wa pay tino nga petsa sa paglubong.
Si acting Lapu-Lapu City Vice Mayor Harry Radaza nihulagway ni Gomez nga ‘big loss’ sa Konseho.
Siya maoy nagpaluyo sa pag-usab sa ngalang ‘Bahugsa Mactan’ ngadto na sa ‘Kadaugan sa Mactan’ nga saulogon sunod buwan sa dihang gitudlo nga tourism commissioner si Gomez atol sa pagpangatungdanan ni Arturo ‘Boy’ Radaza niadtong 2002.
“I have learned a lot from him. He is one of my mentors (tungod sa iyang pagka-experienced isip public servant),” saysay ni Radaza sa Superbalita Cebu.
Nipasalig si Radaza nga adunay himuong necrological service ni Gomez sa city hall.
Samtang ang city director sa Department of Interior and Local Government (DILG) Lapu-Lapu Johnjoan Mende nagkanayon nga ang bakante nga posisyon sa Konseho human sa kamatayon ni Gomez magagad sa appointment gikan sa buhatan sa presidente. “By appointment sa president through the executive secretary. Kinahanglan nga naay nomination sa (political) party,” pasabot ni Mende.