60 ka paresan gikasal ni Palma isip tipik sa sumad sa birthday ni Camomot
Subay sa ika-103 nga kasumaran sa adlawng natawhan ni Obispo Teofilo Camomot karong adlawa, usa ka mass wedding ang gipahigayon niadtong Martes diin 60 ka mga paresan ang gikasal.
Mismo si Cebu Archbishop Jose Palma mao ang nangulo sa maong kasal.
Usa ang magtiayong Pansit sa 60 ka paresan nga gikasal sa gipahigayon nga mass wedding sa Daughters of St. Teresa Chapel sa Valladolid dakbayan sa Carcar niadtong Martes.
Bisan sa pangedaron, apan wa kini makapugong sa magtiayong Corazon ug Godofredo Pansit nga magpakasal sa simbahan.
Si Corazon, 57 ug Godofredo, 63 mao ang labing hamtong nga magtiayon nga gikasal niadtong Martes.
Gikan sa Sitio Lower Tawog, Valladolid ang magtiayon, kinsa aduna nay lima ka mga anak.
Gibutyag ni Corazon nga 36 ka tuig na sila sa iyang bana apan sa huwis lang sila makasal hinungdan nga gusto usab nila nga makasal sa simbahan.
Dugang niya nga tungod kay wala makasal ilang tulo ka mga anak nga aduna na’y kapuyo, gusto nila nga mamahimong ehemplo ug gusto usab nilang makadawat og grasya sa kahitas-an.
Si Palma sa iyang wali nagkanayon nga usa ning kasal sa labing importante nga sakramento sa simbahang Katoliko aron usab makadawat og grasya sa Ginuo kining mga magtiayon.
Si Rev. Mother Ma. Louella Grace Buscato, superior general sa DST kinsa nagsaulog sa iyang ika-50 ka adlawng natawhan niadtong Martes, nagkanayon nga mahimo na unyang tinuig ang ilang aktibidad sama sa mass wedding.
Kaswerte ninyo, noh, kay as I said, kini gibuhat nato paghanduraw kay Camomot sa iyang kaayo ug siyempre kon dinhi siya, malipay. Miduol ta sa mga sakramento kay para niya kuwang ang atong mga paningkamot kon di kini makapakusog sa atong kinabuhi nga Kristohanon. - Cebu Archbishop Jose Palma sa mga gikasal.