Tokhang pa more!
Nalipay ko nga bukas na si Presidente Duterte nga ibalik ang mga sakop sa Philippine National Police (PNP) sa kampanya batok sa ginadiling drugas tungod sa pagsiaw na sa mga drug pushers sa atong nasud. Mas epektibo man gud ang PNP kay aduna kini mga presinto sa tanang siyudad ug kalungsoran sa tibuok nasud.
Suma sa akong gihisgutan sa milabay nga lindog nga wa ako makauyon sa pagpa-undang sa police operation batok sa mga drug dealers ug uban pang may kalambigitan sa iligal nga drugas tungod lang sa pipila ka mga sakop sa PNP nga salawayon. Kon magsakit ang ulo sa usa ka tawo dili man putlan siya og ulo kon dili pangitaan og remediyo aron siya maayo.
Maayo nga mao kini ang gisubay sa presidente. Iyang gisugo si PNP Chief Director General Ronald “Bato” dela Rosa nga mga piniling pulis lamang ang maglangkob sa mga drug enforcement units. Ang Philippine Drug Enforcemnt Agency ( PDEA) gihapon ang lead agency batok iligal nga drugas sigun sa balaud.
Opurtonistang mga senador gipalayas
Usa sa akong gituki sa milabay nako nga kulom mao kining mga opurtonistang senador nga sakop sa Liberal Party (LP) nga mipasilong sa majority party aron mahimong chairperson sa mga senate committees. Ang maong mga senador gitangtang sa majority ug gihukasan sa ilang mga komitiba. Sila mao si Franklin Drilon, Francis Pangilinan, Bam Aquino ug Risa Hontiveros.
Si Drilon giilisan pagka-Senate President Pro Tempore ni Minority Leader Ralph Recto nga miabin na sa majority, si Senadora Cynthia Villar maoy mipuli kang Pangilinan sa agriculture, si Senador JV Ejercito mipuli kang Hontiveros sa health committee ug si Aquino sa education committee gipulihan ni Senador Chiz Escudero.
Ikatulong taytayan
Nalipay ako, dala ang pagduda, kon matukod ba gayud ang ikatulong taytayan nga magdugtong sa mainland Cebu ug Cordova. Kini gud nga ceremonial launching wa man magpasabut nga mahinayon na ang katukuran.
Kining maong taytayan nga tukorun sa Metro Pacific Tollways Development Corporation (MPTDC) pinaagi sa ilang subsidiary Cebu Cordova Link Expressway Corporation mogasto og P27.9 billion. Pila man diay ilang pangayuon nga toll aron mabawi nila kini sud sa 25 ka tuig? Kon dako kaayo ang toll wa say moagi kay naa may unang taytayan nga way bayad. Di usab mabawi ang construction cost sud sa 25 ka tuig kon gamay ra ang toll.
Kita hinuong ordinaryong tawo di makakita sa mga butang nga makit-an lamang sa mga visionary. Mahimo bang sultihan ta nila kon pila ang tinuod nga toll nga ipahamtang sa moagi niini ug pila ka tuig nila recover ang construction cost nianang maong proyekto?