Silot sa kamatayon
Giuyonan sa House of Representatives sa ikaduhang pagbasa niadtong Miyerkoles ang House Bill 4727 nga magpabalik sa silot sa kamatayon alang sa mga salaod sa illegal nga drugas.
Nagkaduol na ang pagpasar sa maong balaudnon pinaagi sa ikatulo ug pinal nga pagbasa. Niining higayona, igo na lang nga botaran kini sa mga kongresista.
Sa ato pa, mawagtang na ang mga extrajudicial killings ug pulihan sa judicial killing na, kay ipaagi na man unya sa husgado.
Napakyas ang minaldito nga mosyon ni Kongresista Edcel Lagman nga tangtangon ang “death” gikan sa maong balaudnon. Matod pa ni Kongresista Reynaldo Umali sa Oriental Mindoro, asa man kag balaudnon nga magpabalik sa death penalty nga way death.
Ang tumong ni Lagman nga ilisan ang death og reclusion temporal ngadto sa reclusion perpetua. Sa ato pa ang labing bug-at nga silot kutob lang sa 40 ka tuig nga pagkabilanggo.
Apan sa dihang gipabarog ang mga kongresista kon si kinsay mosuporta ni Lagman, 23 ra kabuok ang nibarog. Ang Kongreso diay usa ka numbers game. Legal lang ang ilaha, di sama sa masiao, swertres ug jueteng. Ang maong balaudnon naglakip unta sa 23 ka mga kaso nga pagasilotan sa kamatayon. Karon, kadto na lang mga kalapasan sa balaod batok sa illegal nga drugas. Ang gubat batok sa illegal nga drugas nikalas na og kapin sa 7,000 ka mga kinabuhi.
Unang giwagtang sa mga magbabalaod ang kasong plunder. Pero nakabantay sila nga delikado nga silay maunay niini kon makiha silag plunder.
Sama da sila nga naghikog kay ang silot ra ba mahimong ipahigayon pinaagi sa firing squad, pagbitay ug lethal injection. Delikado kon ang mga kongresista maoy unang mabitay.
Ang maong balaudnon di magmando nga ipahamtang gyud ang silot sa kamatayon. Ang huwes gihatagan sa kahigayonan nga mopahamtang lang sa life sentence imbis sa death penalty.
Apan kon nagdali-dali ang House of Representatives sa pagpasar sa maong balaudnon, ang Senado hayan nga malangan sa pagpasar niini tungod kay daghang mga senador nga nisupak sa pagpahamtang og balik sa silot sa kamatayon.
Si Senate Majority Leader Vicente “Tito” Sotto III niingon nga ang maong balaudnon anaa pa sa committee level. Ila pang gihisgotan, pero di nila ikapasalig nga ilang ipasar. Naglahugay na didto sa Senado, pero wa mausab ang baruganan sa mga senador nga nisupak niini kay matod pa ni Sotto, duna silay demokrasya sa Senado.