Nakauyon ra sab ko
Ug tuod man, nigawas gyud ang akong bagong piktyur dinhi. Nindot man diay! Haha!
Ayaw na lag palag. Matud pa god sa kanta: "Learning to love yourself/ Is the greatest love of all." O-ha! Syempre no?
Pero dunay nisulti nga mora kuno kog foreigner. Na sab! Hehe! Nahitabo na ni didto sa Catmon atol sa ballroom dancing sa mga sakop sa Catmon Global Association nga mga balikbayan.
Sa akong post sa Facebook, akong gisulat nga adtong higayona, wa ko kaseguro kon modako ba ang akong atay o mainsulto. Yay!
*** Kaluoy sab ni Steve Harvey. Usa ka tuig kapin human napalpak siya pag-anunsyo sa hustong mananaug sa Ms. Universe, nahisgutan na sab siya dihang nasayop si Warren Beatty sa pagbasa sa mananaug sa best picture sa nilabayng Oscar Awards.
Kuno nag-Steve Harvey si Warren. Duna sab bayay nahitabo dinhi sa Cebu nga susama ana di pa lang sab dugay.
Di lang nako hisgutan kay ako bayang amigo ang hingtungdan. Seguradong naningkamot na intawn to paghikalimot sa nahitabo ug nga mag- move on na. Di lalim ang masayop.
*** May panahon gyud nga mabaw ra ang imong pagkatulog. Nga bisan gamayng kasikas makamata na dayon ka.
O kon mobangon ka aron pagtubag sa sugo sa lawas, di ka makabalik dayon pagkatulog. Mao ni hinungdan nga natulog na lang gyud ko adtong Sabado sa hapon imbes motambong sa paglunsad sa libro ni Atty. MC Gordon nga Higher Law.
Hasta ang ako untang pagsuway og apil sa pagwiriswiris sa papel aron makamugnag buhat sa arte nga ako ray makauyon, napagan pod. Paet!
Pero nakabasa ko sa Facebook nga kini kunong tanom nga aloe vera, snake plant, jasmine, lavender ug duna pay usa, kon ibutang tapad sa katre, makatabang kuno nga nindot ang imong katulog.
Posible pa gani tingali nga magdamgo kag colored. Di na man god uso ang black and white. Hehe. *** Nakahisgot man tag colored, maayo na lang kay di kaayo buhi ang kolor sa pelikulang Hacksaw Ridge nga gidirihir ni Mel Gibson. Usa sab hinoon ni ka paagi aron pagpasabot nga dugay nang nahitabo ang gisaysay sa pelikula.
Nakahinumdom ko sa Passion of the Christ nga si Mel gihapon ang direktor ug sa kang Steven Spielberg nga Saving Private Ryan nga mora gyud og tinuod ang mga samad agi sa bala ug bomba.
Grabe!
***
Uy! Naa diay ron sa Carcar City si Jose Mari Chan. Kon wa ko masayop, guest performer siya sa unang songwriting contest nga halad alang ni anhing Msgr. Teofilo Camomot.
Istoryahan ta unya mo kon makahigayon kog tan-aw.