TALK TO PAPA JOE

Haw-ang nga kinabuhi

Dear Papa Joe,

Tawga lang ko sa ngalan nga Oscar. Naa na ko karon sa America nagpuyo, minyo ug dunay tulo ka mga anak anak. Maayo ang akong pagkabutang diri kay naminyo man ko ug nurse ug ni- migrate mi diri.

Taas ang estorya pero ako lang mub-on ang akong sugilanon. Nakakita ko sa episode sa Jessica Sojo sa GMA 7, kadtong Australiano nga nianha sa Pilipinas para sa pagpangita sa iyang parents ug kaluoy sa Diyos, nakit-an gyud niya.

Mao ni ang akong suliran kay binilin ra sab ko sa una dihang bata pa ko sa nagpadako nako kay ang akong mama dayo lang kuno ug nagtrabaho sa bar. Napamabdosan siya mao nga nagdako ko nga wa gyud ko kaila sa akong parents. Bisan karon duna koy pamilya, nakaingon ko sa akong kaugalingon nga unfair kay ang uban gitagbo gyud sa ilang parents, nagdako uban nila, pero ako maorag kuli na nga makit-an pa sila. Unsa may mahimo kaha nako ? Palihug tambagi ko.

OSCAR

Oscar,

Lisod man sab kon manawagan ka kon kinsa nga babaye nga babaye nga nagwork sa bar kaniadto nga gibilin ang bata. Sure ko, daghan ang pwede moangkon nga ikaw ilang anak kay daghan ang nakabuhat ana nga mga inahan nga biyaan lang ang anak human mogawas kay di pa responsable ug sagol kahadlok. Sa laktod, di pa sila andam sa responsibilidad.

Mosamot pa nga naa na ka sa Amerika karon nagpuyo, basin duna pay mo- take advantage sa oportunidad. Hinuon, naa may DNA test pero mao lagi gasto sab kaayo kay mahal. Dawata na lang na ang nahitabo kanimo bisan ing ato tong imong mama. At least gipagawas ka ug wa ka niya gipa- abort, sama sa ubang mga puya nga gilabay lang. Tan-awa gi grasyahan sad ka karon, di ba? Learn to divert sa imong kahinam sa ginikanan ngadto sa imong mga anak. Daghang salamat.