You mean everything to me
Nalipong na ko. Daghan na kog nainom. Daghang stateside nga wine sa among gamay nga bar sulod sa dako namong balay. Anhi ko modangop kon maguol ko.
Miipis na sab kog wine sa akong baso.
“Daghan ka nag nainom, Katrina. Ingon ka na ba lang gyud ani kanunay kon imong masakpan si Saul nga duna na say laing girl nga gikabuangan?”
Gipasipltan ko lang si Marlon. Unya gitungab ko ang bino sa akong baso. Gihurot kog inom. Mitikuka ko. Nagdagan kong mipaingon sa abli nga bentana sa sala. Misuka ko. Nagluha-luha ko sa kadaghan sa akong nasuka. Nabatyagan ko ang paghapuhap sa akong buku-buko. Milingi ko. Gipasagdan ko si Marlon nga nagpadayon paghapuhap sa akong buku-buko.
Giagak ko ni Marlon sa pagpasulod sa akong kuwarto. Iya kong gipahigda. Unya gihabolan ko niya.
Gibati ko ang kasakit sa akong ulo pagmata ko na nianang pagka buntag. Gipisil ko sa akong mga tudlo ang akong agtang. Unya naabli ang pultahan sa akong kuwarto. Misulod si Marlon nga nagsapwang og tray. Diha say gatas sa usa ka baso. Gipahimutang ni Marlon ang panaksan ug gatas sa pasistor nga iyang gibira aron masimpig kini sa kilid sa akong kama. Mibangon ko. “Maayo ning init nga sabaw sa baka aron mahuwasan ka sa hingpit, panington ka man gyud ani. Unya, imna ning gatas.”
Mitalikod si Marlon aron paggawas na sa akong kuwarto.
“Wait!” Miatubang si Marlon nako. Seryuso kaayo siya. “Thank you, ha, Marlon.” “Gibilin ka sa imong Papa ug Mama namo ni Mama Tanya. Gibuhat lang namo ni Mama ang among tulubagon nimo nga di ka pasagdan.”
“Hain man diay si Mama nimo? Kagahapon ko pa siyang wa makita dinhi.”
“Gipapahuway ko siya sa iyang kuwarto kay gihilantan. Pero maarang-arang na siya karon.”
Miyangu-yango ko. Unya migawas na sa akong kuwarto si Marlon. Mipahimutang kog lingkod sa ngilit sa akong kama. Unya mihigop ko sa init nga sabaw sa baka. Kalit nga mikiring ang call alert sa akong selpon. Nakahibawo ko nga si Saul ang nanawag. Naghunahuna ko kon tubagon ko ba siya. (SUMPAYAN)