BEERMEN 2-1 NA

Human maleksiyon sa ilang kapildihan sa Game 2, gisiguro sa San Miguel Beer nga dili na kini mausab pa pinaagi sa pagdominar og balik sa Barangay Ginebra, 99-98, niadtong Miyerkules aron sakmiton ang 2-1 nga bintaha sa PBA Philippine Cup best-ofseven finals sa Araneta Coliseum.

Si Chris Ross, kinsa usa sa mga na- fouled out sa Game 2, maoy nakapausab sa dagan sa opensa sa Beermen human kini mipabuto og tres nga maoy nagduslit sa 12-0 nga rally paingon ngadto sa ilang kadaugan nga gisaksihan sa dul-an sa 17,000 ka mga dumadapig.

Miabag ni Ross si Alex Cabagnot samtang nahibalik na usab ang saktong dominasyon ni June Mar Fajardo sa ilawom nga bahin diin mitapos kini og double-double aron pangulohan ang Beermen aron mapapas ang labaw sa Ginebra. “I thought we will lose again because they came out really strong, but we’re able to recover after the first half,” matod ni SMB coach Leo Austria nga nakutloan sa iyang pamahayag sa Spin.ph. Suwayan sa Beermen sa pagtikang paduol sa ilang tinguha nga ikatulong sunodsunod nga titulo (threepeat) sa maong conference sa Game Four karong gabii sa Araneta Coliseum.

Si Ross mitapos sa duwa nga may 24 puntos gawas sa iyng upat ka rebound, us aka steal ug walo ka assists samtang si Cabagnot mimarka og 20 puntos nga gidayandayanan og tulo ka triples.

Samtang si Fajardo gawas nga maoy miankorahi sa ilawom nga bahin mitapos sa duwa nga may 17 puntos, 18 ka rebounds, tulo ka blocks, tulo ka assists ug tulo ka steals sa 38 minutos.

Kini dakong sukwahi sa nahitabo sa Game Two diin igo lang siya nakapugnit og 10 puntos ug migradwar sa tungatunga sa fourth quarter.

Si Marcio Lassiter, ang laing Beerman nga na- fouled usab sa Game Two, pabilin nga nagmahaiton sa iyang mga itsa ug mipugnit kinig 16 puntos, unom ka rebounds ug duha a steals.

Ang tres ni Joe Devance maoy naghatag og balik sa labaw sa Ginebra, 88-87, apan kadto ray katapusang nilang hunat sanglit sa nahabiling kuwatro minutos ang Beermen wa na kapugngi.

Si LA Tenorio nangulo sa Ginebra nga may 16 puntos, lima ka assists ug lima ka rebounds samtang ang ubang Kings igo lang nakapuntos ug otso paubos.

Mga puntos: SMB (99) – Ross 24, Cabagnot 20, Fajardo 17, Lassiter 16, Santos 9, Tubid 6, Reyes 3, Heruela 2, Espinas 2, Garcia 0 Ginebra (88) - Tenorio 16, Ferrer 15, Aguilar 12, Ellis 12, Caguioa 11, Thompson 8, Devance 6, Mercado 5, Marcelo 3, Helterbrand 0.