CAVS GITIPI SA CELTICS

Mikulit og kuwatro puntos si Isaiah Thomas sulod sa katapusang minuto sa duwa aron aswaton ang Boston Celtics ngadto sa 10399 nga kadaugan batok sa defending champion Cleveland Cavaliers sa nagpadayon nga season sa NBA.

Ang tres ni Thomas gikan sa pasa ni Marcus Smart sa nahabiling 49 segundos maoy naghatag sa Celtics og 99-97 nga labaw.

Apan sa dihang natabla ni Kyrie Irving, 99-99, ang score, wa usab usiki ni Thomas ang kahigayon ug iyang gikompleto ang duha ka free throws sa foul ni Deron Williams sa nahabiling 28 segundos nga maoy nahimong likoanan sa kadaugan.

Si Thomas mitapos sa duwa nga may 31 puntos sa ika-39 nga daog sa Celtics sa 61 ka duwa. Ang laing duha ka free throws ni Jae Crowder sa foul ni LeBron James may nagselyo sa kadaugan. Siya mitapos sa duwa nga may 17 puntos.

Lab-as pa sa ilang kadaugan batok sa Milwaukee Bucks, ang Cavaliers nasugamak sa ilang ikaduhang kapildihan sa uwahi nilang tulo ka duwa. Wa mapaigo ang triple-double performance ni James kinsa may 28 puntos, 13 ka rebunds ug 10 ka assists ug ang Cavaliers nahagsa sa ika-18 nilang pildi sa 59 ka duwa.

Si Kyrie Irving mikulit usab og 28 puntos apan ang bag-o nilang nakuha nga si Deron Williams aduna lay 28 puntos ug mipakatap og duha ka as- sists sulod sa 24 minutos.

Samtang sa laing engkuwentro, giluwas ni Kawhi Leonard ang San Antonio Spurs pinaagi sa iyang katapusang nuebe puntos, lakip na niini ang bayanihong itsa nga maoy mipukan sa Indiana Pacers, 10099, didto sa AT&T Center.

Ang Spurs perming naggukod sa agresibong Pacers kinsa nakaposte og otso puntos apan hinayhinay kining misikit sa unang bahin sa fourth quarter hangtod nga ang panagkumboya sa reserves nga pinangulohan ni David Lee, nakuha sa San Antonio ang labaw, 91-89, 1:39 ang nahabilin.

Si Leonard mitapos sa duwa nga may 31 puntos ug 10 ka rebounds alang sa San Antonio nga karon aduna nay 46-13 nga baraha.

/AP SMALL BUT TERRIBLE. Ang gamay apan sakit nga pointguard sa Boston Celtics nga si Isaiah Thomas (nag-dive) nga mitugpa paingon sa nahayang nga si LeBron James sa Cleveland Cavaliers niining aktoha atol sa ilang duwa kagahapon. Si Thomas ang wa mapugngi sa naghinapos nga bahin ug maoy mipadaog sa Boston batok sa inilog nga Cleveland.