PULIS SAKOP NI BAROK?
GIRELIBUHAN KAY `SHABU SUPPLIER’ SA PINIRISO SA LILOAN
Gipadis-armahan ug giparelibuhan sa hepe sa Liloan Police Station ang usa niya ka sakop nga gitumbok sa usa ka piniriso nga maoy supplier nila og shabu.
Ang lakang gihimo human masakpi sa greyhound operation niadtong Huwebes nga naghupot ang tulo ka mga piniriso og shabu.
Usa kanila maoy nisulti kang Chief Inspector Franco Oriol nga usa ka sakop niya maoy ilang supplier.
Ang ngan sa pulis gipugngan sa Superbalita Cebu samtang wa pa makuhai sa iyang habig.
Sa samang higayon, wa gisalikway ni Oriol nga may kalambigitan kini sa grupo ni Alvaro “Barok” Alvaro kay ang hinigugma niini igsuon sa sakop sa giingong drug lord sa northern Cebu.
Kagahapon sa buntag, gipadestino na ni Oriol ang mao nga pulis sa Cebu Provincial Police Office (CPPO) samtang giimbestigar pa.
Si Oriol nga nahinabi sa Superbalita Cebu niingon nga niadtong Huwebes sa gabii human sa greyhound operation, ilang gipatawag ang mao nga pulis dayon gidis-armahan.
Si Oriol nibutyag nga usa sa tulo ka mga pinierso nga naghupot og drugas nisulti kaniya nga ang mao nga pulis maoy tigtunol nilag drugas aron duna silay magamit sa pagsuyop, ingon man mabaligya.
Ang pulis motunol og 10-20 ka pakiting shabu matag semana ngadto sa pinirisong pusher.
Si Oriol nibutyag nga dihang gipangutana nila ang iyang sakop kabahin sa piniriso, hugtanon kining nanghimakak sa pasangil.
Giinsister niini nga gikontrahan siya sa mga pinereso tungod sa iyang kaestrikto..
Wa matagbaw si Oriol sa pamahayag sa iyang sakop kay nakakuha silag information nga ang igsuon sa drug pusher nga napriso nga sakop ni Barok gikarelasyon” sa maong pulis.
“Makita nato ilang koneksyon. Suod silang duha sa pinirisong drug pusher. Mao diay kay iyang uyab ang igsoon ani,personal pa siyang motunol sa drugas. Pagkapaita, pulis pa gyud,” dugang ni Oriol.