Palma wa na mahibung ni Duterte
Wa na masurprisa si Cebu Arsobispo Jose Palma sa padayon nga pagpangatake ni Presidente Rodrigo Duterte sa kaparian sa simbahang Katoliko sa nasod bahin sa gubat batok sa ginadili nga drugas.
“I'm not surprised if he continues to attack. He knows that we have spoken and we have our minds known, many of the things we've spoken he may not like,” pahayag sa arsobispo sa pakighinabi sa mga tigbalita kagahapon.
Siya ang nangu sa misa sa graduation sa ikaunom nga batch sa Surrender to God (SuGod) Drug Recovery Program sa artsidyosesis sa Sugbo sa pakigtambayayong sa pribadong sektor.
Si Palma wa makauyon nga gipahubo ug wala nay mga sapot ang mga bilanggo sa Cebu Provincial Detention and Rehabilitation Center dihang gironda sa mga awtoridad ang provincial jail niadtong Martes sa kaadlawon.
Matod niya dunay legal ug insakto nga paagi nga angay tumanon sa paghimo niini.
“We know that there are rules. We know that we could not subject the person to shame… These are improper things to do,” pahayag sa arsobispo. Reaksyon kini ni Palma human ang Amnesty International nipadayag og kabalaka sa makita sa online sa hubo nga mga lawas sa mga bilanggo sa CPDRC atol sa hiniusang operasyon sa mga awtoridad.
Si Palma namulong ang SuGod program maoy tubag sa hilak sa daghang mga tawo nga nalambigit kaniadto sa ginadili nga drugas nga nitahan sa ilang kaugalingon ngadto sa awtoridad.
Ang arsobispo nagtuo nga ang Malacañang bisan si Duterte nasayod sa gibuhat sa simbahang Katoliko pagtabang sa mga drug surrenderee nga gusto magbag-o sa kaugalingon.
Siya nidugang ang pagtahan sa kaugalingon ngadto sa Ginuo ang labing maayo nga paagi sa kausaban diin daghan ang natandog ug natabangan sa SuGod program.
Si Fe Barino, program director sa SuGod program, niingon nga sukad niadtong Augusto sa miaging tuig, matag buwan, duna silay gipahigayon nga seminar alang sa mga drug surrenderees.
Matod niya dili ni ordinaryo nga seminar tungod kay scientific ug mga professional ang nagdumala niini.
Alang ni Barino dili na angay pahibaw-on ang presidente sa mga lakang nga gipangbuhat sa simbahan pagtabang sa mga drug surrenderee.