Mga negosyante nalipay sa saad ni Pres. Duterte
Nalipay ug positibo ang reaksyon sa mga negosyante sa Sugbo human pipila sa mga sugyot nila ang gitubag ni Presidente Rodrigo Roa Duterte atol sa induction sa bag-ong opisyal sa Cebu Chamber of Commerce and Industry niadtong Huwebes sa gabii.
Si Duterte ang espesyal nga dinapit sa mga negosyante atol sa induction sa Waterfront Mactan.
Dili lang ang Cebu Chamber ang anaa sa maong kalihokan tungod kay ang ubang chamber of commerce anaa usab.
Matod ni Melanie Ng, ang nagpabiling presidente sa CCCI nga nalipay sila nga nipasalig ang Presidente nga himuong tulo ka adlaw lang ang proseso og business permit.
Dugang sa pag-awhag ni Duterte ang publiko nga magpakabana.
Pinaagi niini masiguro madasig usab ang mga negosyante nga motuman sa gikinahanglang dokumento sa alang sa mga negosyo niini.
Nagpasalamat usab kini sa Office of the Presidential Assistant for the Visayas (OPAV) tungod kay pinaagi sa maong buhatan mas duol ang Malacañang sa Sugbo.
Bisan paman og wala mahinayon ang forum o dialogue sa mga negosyante kang Duterte tungod sa limitado nga oras apan gipahibawo ni Ng nga nasumiter na nila sa Malacañang ang mga isyu nga gusto nilang tutokan sa adminsitrasyon ni Duterte.
Dugang ni Ng nga pinaagi sa ikatulong taytayan sa Sugbo, makadasig kini sa mga investor nga magbutang og negosyo sa countryside apan duol gihapon sa syudad.
Malaumon hinuon ang mga negosyante nga dili madugay ang pagtukod sa maong taytayan tungod kay timely sab kini sa bag-ong terminal sa Mactan Cebu International Airport.
Si Glenn Soco, presidente sa Mandaue Chamber niingon nga nakita na ang kabag-ohan nga gilauman nila.