14 ka balay naugdaw sa sunog sa Canduman

Di mominos sa 14 ka mga balay ang naugdaw sa sunog sa Canduman Housing, Barangay Canduman, siyudad sa Mandaue kagahapon sa buntag.

Matod ni Fire Marshal Sinsp. Josephus Alburo nga di mominos sa P130,000 ang danyos sa maong sunog.

Gitataw ni Alburo nga wa hinuoy mga naangol sa maong sunog nga nagsugod sa panimalay sa usa ka Ernesto Ynot, diin ang iyang panimalay ginama sa light materials ug sa dihang kini nasunog, dali kining mikuyanap sa mga tapad nga kabalayan.

Base sa insiyal nga imbestigasyon sa Bureau of Fire Protection (BFP)-Mandaue nga ang hinungdan sa maong sunog nagsugod sa “wa mabantayi” nga ceiling fan ni Ynot.

Nadawat sa BFP ang alarma mga alas 9:25 kagahapon sa buntag. Nakontrolar ang kayo sa kabomberohan mga alas 9:48 sa buntag ug gideklarar nga fire out mga alas 10:02 sa buntag.

"Naa sab ta na-encounter nga problema sa pag-responde sa sunog labi na diha sa Centro nga grabe ang traffic ug ang kagamay sa dalan padung sa Canduman Housing," ni Alburo. Nipasidaan usab ang fire marshal batok sa daghan kaayonng mga extension cords tungod kay matod pa kini maoy hinungdan sa pag-overheat sa appliances ug maka- overload sa sistema.

Si Mayor Luigi Quisumbing, sa laing bahin, niingon nga moabag ang kagamhanan ug ang city social welfare office sa mga panginahanglan sa

apektadong pamilya.

"The reason it is March is that there is usually a higher number of fires during this month so it was declared Fire Prevention Month as a reminder to stay vigilant. Please know where the nearest fire fighting equipment is and coordinate with your Barangay officials regarding disaster managements plans," sumala sa Mayor Quisumbing.