Madugo-ong operation

Daghan ang nagtuo nga mobalik na usab ang maduguong panghitabo sa kampanya batok sa gidiling drugas human nga gitugotan na usab ni Presidente Rodrigo Duterte nga makabalik na sa pagpahigayon og mga

anti-drug operations ang mga kapulisan. Niadtong Enero 30, gimandoan ni Philippine National Police (PNP) chief Ronald dela Rosa ang mga police units sa paghunong sa ilang anti-illegal drug operations tungod sa reklamo nga kini gigamit lang sa mga abusadong pulis sa pagpangurakot.

Usa sa mga sanglitanan niini mao kadtong usa ka negusyanting Koreano nga gidakop sa mga sakop sa PNP ug gipangayoan og minilyon ka pesos nga ransom bugti sa pagbuhi niini, apan unsang pagkaunsaa nga ila na man hinuon kini nga gipatay.

Kini maoy tipik lang sa daghan pang mga reklamo nga gikasagmuyo kaayo sa presidente kay daw sa gigamit man hinuon sa binuang ang iyang katuyoan nga mao ang paghipos sa mga

drug personalities sa nasod. Sa temporaryong pagpa-undang sa mga pulis sa ilang antioperations, daw sa nagsadya ang mga durugista kay wala na may sabod ang ilang pagpayuhot sa gidiling drugas.

Gani ang intelligence report nagkanayon nga namalik ug nagpalig-onay sa ilang grupo ang mga sindikato sa illegal drugs.

Karon nga gibalik na ang anti-illegal drug units ubos sa PNP posibling tugkan na unya usab og hubag-hubag kining mga drug

personalities nga naaktibo og balik sa ilang ilegal nga negusyo. Daghang dugo na usab unya ang mobanaw sa tugkaran. Kining bag-ong unit sa PNP langkuban sa mga hinashasan nga mga pulis nga adunay mga maayong record sa panerbisyo.

Gipaubos na usab kini sila sa briefing aron ipasubay ang saktong proseso ug paagi sa ilang operation, apan wa kini magpasabot nga dili na lang sila moprotehir sa ilang kaugalingon atol unya sa pagpahigayon og raid.