Nakatug samtang nag-drive
Sud ning tuiga duha na ka aksidente sa karsada ang akong gi- cover nga naglambigit ug mga dagkong truck . Pulos ni nahitabo sa ciudad sa Naga. Sa niaging bulan usa ka truck nidaro sa usa ka tindahan sa North Poblacion. Suerte kay wa maapil ang balay sa tag-iya sa tindahan nga naa ra sab sa kilid. Ang katarungan sa driver nga iyang gilikayan ang usa ka motorsiklo nga nikalit ug labang sa karsada.
Sa niaging Huwebes lain na sab nga truck ang nidaro sa usa ka tindahan ug laing water refilling station didto sa Barangay Tuyan. Nagupok ang tindahan ug niharag ang
refilling station. Naputol sab ang mainline sa tubig. Ang katarungan sa driver nga si Sammy de Lima nakatug siya ug diha na nakamata paglagubo sa iyang truck. Si de Lima way garas pero ang iyang truck boy nga si Rodbey Brandas nagisian sa iyang li-og.
Akong gipangutana si Rodney nganong wa niya pukawa ang driver. Ang iyang tubag nga mas nauna pa siya ug katagpilaw. Ang tag-iya sa tindahan ug ang establismento nga gipaabangan sa tag-iya sa refelling station niingon hinuon nga di na siya mosang-at ug reklamo. Ang iyang gusto nga ayuhon lang ang mga nangaguba nga estraktura. Diha may iro nga naapil ug daro ug namatay, magpabayad ra sab ang tagiya. Nahitabo ni alas 4 sa sayo sa buntag. Ug mao ni akong gikahadlokan matag biyahe nako sa oras sa kadlawon nga mingaw na kaayo ang karsada. Kusog kaayong magdagan ang mga sakyanan kay lage way trapik. Lahos lahos lang. Unya ko mapareha sa giingon ni Sammy nga nakatug siya puwerting luoya sa gikasugat ug kadtong mga balay ug establismento nga naa sa daplin sa karsada.
Akong nasayran gikan ni Sammy nga alas 10 sa gabii nagdeliver sila og aspalto padung sa lungsod sa Borbon sa amihanang Sugbo. Pagka alas 2 sa kadlawon nibiya sila sa Borbon balik sa Naga City. Wa man hinuon mokumpirmar si Sammy nga gikapoy siya mao nga giabot og duka. Pero mao ni ang akong gituhoan nga hinungdan. Tungod sa ka layo sa biyahe giduka ang driver. Ang maayo untang buhaton ni Sammy nga sa pagkamatngon niya ug duka nangita siya ug daplin ug natug. Total humana man sila ug deliver. Mao sab ni ang angay nga buhaton sa uban. Pero kung mangita mo ug daplin siguroa nga ang inyong sakyanan wa diha sa daplin sa karsada. Pangita ug bakanting luna kay kung ang inyong sakyanan inyo rang ipidpid sa daplin basin ang laing mga driver nga nagduka masangit o mabangga. Busa kamong mobiyahe ug lawom na nga gabii o kadlawon palihug mag-igmat igmat ta. Ayaw pagkumpiansa kay basin makasugat mo ug sakyanan nga ang
driver puwerte nang haguka. Unya mga truck boy tabangi ang inyong driver nga di makatug. Ayaw paguna una ug kahinanok.