Giamigo ang mga kontra
Kon dili mapiog ang kaaway kinahanglan amigohon apan kon tuyuan sa pakig-away, ang away maoy iyang trabaho ug dili sibogan. Ingon niini ang birtod sa liderato ni Pres. Digong Duterte.
Padulong na ang bilateral peace agreement tali sa gobyerno ug CPP-NPA-NDF nga ang talad sa kasabotan sa kalinaw tua umola sa Oslo, Norway ug gilaoman nga matiwas sa Netherlands.
Inig butho sa maong kasabotan hayan buhian ang 434 ka mga political prisoners ug communist rebels.
Gani duna nay konbiktado sa murder ug kidnapping ang nakadawat og presidential pardon nga sila si Martin Villanueva, Bonifacio Sutyom, Dindo Absalon ug Rico Bodino.
Si Nur Misuari nga founder sa MNLF nakigkita na ni Duterte nga nagpaihap o miyukbo alang sa kalinaw.
Si Hashim Salamat sa MILF nahumok ang balatian sa dihang gipadali ni Duterte sa kongreso ang mga balaod nga iunod sa gilagdaan nga Bangsamoro Framework Agreement silbing tigbayon sa panagsabot sa kahiusahan.
Ang Maute Group nga nangatake sa Lanao del Sur, nagtanom og bomba duol sa US Embassy ug mipabuto og Improvised Explosive Device (IED) sa Marawi City mipadala na og notisya nga bukas nga makigsabot sa gobyerno. Amigo na sab ni Duterte si Pres. Xi Jinping sa China nga karibal nga nasod ug gani sa pagbisita ni Duterte nakadala og 24 bilyones dolyares para investment dinhi sa nasod, Chinese investors mobobo og pohonan sa negosyo ug railway tukoron sa Mandaue pinaagi sa Chinese Railway Company.
Laing karibal nga si Pres. Vladimir Putin sa Russia milugak ang balatian gani sa pasiunang kasabotan nga ang Russia himoong New OFW Destination human mios-os ang panginahagnglan sa mga OFW sa Middle East gumikan sa pagkatibugsok sa bili sa lana.
Maoy makapahimolos ang mga construction workers, hotel utilities, domestic helpers lakip na sa mga skilled ug professional workers ug Russian delegation nga magpapatigayon mianhi na paggahin og pohonan dugang sa pagpalig-on sa relasyon sama sa panaghigala sa St. Petersburg ug Sugbo, Parnas ug Dipolog.
Migaan usab ang kabubot-on tali ni Duterte ug US Pres. Donald Trump kinsa midapit pag-adto sa White House samtang si Duterte midapit pagpaadto sa Malacañang.
Natataw nga miaslom ang relasyon tali sa Pilipinas ngadto sa United Nations (UN) gumikan sa hulhog sa mga kaatbang ni Duterte nga wala pa makadawat sa kapildihan sa milabayng piniliay. Dunay lakang sa pagpalagpot ni Duterte pinaagi sa pagpa-impeach. Nalimot siguro nga ang presidente gipanalipdan sa immunity from suit. (csa_1156@yahoo. com/0916-734-5737)