3 KA WORLD CHAMPIONS PASIDUNGGAN SA SAC
Mabungahon ang tuig 2016 kon hisgutan ang boksing dinhi sa Sugbo. Gawas sa sunodsunod nga mga promosyon, ang Sugbo, nga gikonsiderar nga boxing mecca sa Pilipinas, nakabaton og tulo ka world champions.
Gipangtumbok mao ang trayanggulo nila ni Johnriel Casimero, Marlon Tapales ug Milan Melindo nga pulos nakahatag og dungog dili lang sa Sugbo kon dili lakip na sa tibuok Pilipinas.
Sa ilang kalampusan, ang tulo parehong major awardees sa 35th Sportswriters Association of Cebu-SMB Cebu Sports Awards karong Marso 7 sa North Wing sa SM City Cebu. Si Casimero nakabawos kang Thai veteran Amnat Ruenroeng pinaagi sa 4th round knockout nga kadaugan nga naghatag kaniya sa International Boxing Federation (IBF) flyweight title niadtong Marso.
Usa kini ka bangis nga panimalos ni Casimero ngadto kang Ruenroeng, kinsa milupig kaniya pinaagi sa unanimous decision sa premiro nilang away niadtong 2015.
Nadepensaan ni Casimero ang iyang korona pinaagi sa 10th round stoppage batok kang British prospect Charlie Edwards sa London.
Sa iyang bahin, si Tapales nakapakita og grabeng determinasyon sa iyang pag-ilog sa korona ni World Boxing Organization (WBO) super bantamweight champion Pungluang Sor Singyu niadtong Hulyo sa miaging tuig sa Thailand. Si Tapales kaduha natumba sa 5th round apan mibangon kini ug iyang napaundang si Sor Singyu sa 11th round.
Samtang si Melindo nagmalampuson na human sa tulo ka mga pagsuway og langkat og world title.
Nakuha ni Melindo ang interim IBF light flyweight title pinaagi sa unanimous decision nga kadaugan batok kang Fahlan Sakkreerin Jr. niadtong Nobiyembre dinhi sa Sugbo.
Hatagan og minor awards sa boksing mao sila si WBO Oriental ug WBO Asia Pacific Youth super bantamweight champion Jhack Tepora, World Boxing Federation (WBF) Asia-Pacific bantamweight titleholder Kenny Demecillo, WBO International featherweight king Mark Magsayo, Neil John Tabanao, Jason Pagara, Jimmy Paypa, Jessie Espinas, WBO Asia-Pacific bantamweight champion Arthur Villanueva, IBF Inter-Continental super flyweight titleholder Jonas Sultan ug amateur boxer Eduardo Gimenez Jr.