BACK-TO-BACK NGA KAPILDIHAN

Sa usa ka talagsaong hitabo, ang Golden State Warriors nakaangkon sa ikaduha nilang sunodsunod nga kapildihan ug ning higayuna, nasungag sila sa Chicago Bulls, 87-94, kagahapon sa National Basketball Association (NBA).

Kini maoy ikaduha pa lang nga higayon nga nasugamak ang Warriors sa duha ka sagunson nga kapildihan sulod sa hapit duha ka mga tuig.

Upat ka mga magduduwa sa Bulls ang ningmugna og double-digit nga puntos nga gipangulohan ni Jimmy Butler, kinsa nipupo og 22 puntos.

Si Bobby Portis nidugang og 17 puntos alang sa kadaugan, nitampo og 12 puntos si Dwyane Wade samtang nihatag og 10 puntos si Robin Lopez.

Ang 87 puntos nga natigom sa Warriors ning duwaa mao ang labing ubos nila sa kasamtangang season.

Ang Warriors napilde sab niadtong Miyerkules, 108-112, batok sa Washington Wizards. Ning duwaa naangol ang wa nga tuhod sa usa sa ilang labing mga pambato nga si Kevn Durant.

Wala pa masayri kon kanus-a

makabalik og duwa si Durant. Hinuon malaumon ang Warriors nga makabalik ra ang kanhi MVP sa dili pa mahuman ang regular season. “Obviously, you feel for him and want him to get healthy as fast as possible but not rush it because we have a long journey ahead of us going into the playoffs,” two-time matod ni Warriors pointguard Stephen Curry kabahin kang Durant. “Next man up mentality, but obviously it will be tough to replace a guy like KD.”

Si Curry, kinsa back-to-back MVP, maoy nangulo sa Warriors pinaagi sa iyang 23 puntos samtang nihatag og 13 puntos si Klay Thompson.

Ang gitawag og Splash Brothers naila unta nga mga tirador sa three-point area apan ning duwaa, pareho silang nagkagidlay ug igo lang kining nakapasulod og tulo ka tres sa 22 ka mga pagsuway.

Ang Warriors katapusang nakatilaw sa labaw, 85-84, sa nahabiling 5:43 minutos.

Sa laing duwa, nagkumboya sila si Damian Lillard ug Jusuf Nurkic sa himatyong minutos sa fourth quarter aron ituboy ang Portland Trailblazers ngadto sa 114-109 nga kadaugan batok sa Oklahoma City Thunder.

Sayong nanginit ang Portland ug mipahagsa gilayon kini og 20-8 nga rally sa first

quarter. Apan nagkasikit ang duwa human dusliti ni Russell Westbrook ang 15-1 nga rally sa tungatungang ug sa sayong bahin sa third period.

Didto na magsugod og katin-aw ang kadaugan sa Portland sa dihang mipabuto sila og 16-0 sa fourth quarter.

/AP GIUSBAN. Si Stephen Curry sa Golden State Warriors nga daw sa igo na lang pagduko human nasinati niya ang ilang ikaduhang sunodsunod nga kapildihan kagahapon sa mga kamot sa Chicago Bulls. Hinuon ang Warriors nga mawagtangan sa serbisyon ni Kevin...