Mahukasan sa chairmanship o di?

Hayan nga mahibaw-an na karong semanaha ang kaugamaon ni Konsehal Doroteo Emit kon mahukasan ba kini sa iyang komitiba sa urban poor.

Una niini ang mga sakop sa Federation of Talisay City Urban Dwellers Association (FETCUDA) miawhag sa konseho nga langkatan si Emit og komitiba tungod kay wa na silay salig niini ug gawas pa nagdalang lang kinig gubot sa ilang pederasyon.

Si Emit miingon nga dako ang iyang pagsalig sa iyang mga kauban sa konseho nga di siya langkatan sa komitiba.

Kini tungod kay ang tanan niyang lakang nga gihimo sa pederasyon adunay pagtugot sa konseho pinangulohan ni Bise Mayor Alan Bucao.

Gani bisan sa iyang gihimong imbestigasyon siya maoy nangulo kay di man modawat si Konsehal Soc Fernandez ug Bucao nga sila ang mohimo sa imbestigasyon. Hinungdan nga ang konseho mitugyan ngadto ni Konsehal Gail Restauro, chairman sa committee on laws and ethics sa konseho, sa pagtuon sa hangyo sa urban poor.

Si Emit daan nang gitambagan ni Bucao nga di magsalig tungod kay bisan og aduna siyay suporta sa konseho apan sa higayon nga makita sa iyang mga kaubang konsehal nga adunay basehanan ang reklamo sa Fetcuda mopagawas sila sa ilang baruganan.

Matod ni Bucao nga sagad sa ilang patun-an sa komitiba molanat ngadto sa duha ngadto sa tulo ka semana una mopagawas og resulta ang konsehal nga nagtuon.

Karong semanaha posibling ipagawas na ang resulta ug mohatag nag rekomendasyon si Restuaro.

Si Restauro miingon nga nalangay siya tungod kay iya mang gipangutana ang mga mipirma sa petition batok ni Emit kon nakahibawo ba sila sa ilang gipirmahan.

Kini human si Emit mipasangil nga ang mga tawo nga nipirma sa petition wa makahibawo sa ilang gipirmahan nga ang unod niini mao ang pagpalagpot kaniya komitiba nga gihuptan.

Si Bucao una nang nanawagan nga kon makita ni Emit nga wa nay salig kaniya ang organisasyon nga iyang gialagaran mas maayong bulontaryo kining moluwat sa iyang komitiba nga gihuptan.