GIPAAK SA BITIN, PATAY

Patay ang usa ka tambalanan atol sa iyang birthday party human gipaak og bitin nga iyang giduwaan niadtong Dominggo sa hapon sa Barangay Guadalupe, dakbayan sa Bogo.

Si Virgilio Ypil, 52, tambalanan sa lugar, napaakan sa bitin sa iyang tuong kamot ug dead- on-arrival (DOA) sa Cebu Provincial Hospital sa dakbayan sa Bogo.

Matod ni PO2 Alexander Ancao, imbestigador sa Bogo Police Station nga nahinabi sa

Superbalita Cebu, si Elbern Miñuza, 30, ulitawo, silingan ni Ypil ang nakakita sa bitin.

Ang bitin may gitas-on nga 6 ka tiil, ang lawas sama kadako sa bukton sa usa ka bag-ong na-ulitawo, ang kolor itom nga may rebito nga puti ug kolor yellow.

Uban sa iyang barkada, si Miñuza nagkalaw sa dalan nga ang daplin libon, ug nakabantay og kasikas sa kasagbutan.

Nakita niya nga dunay dako nga bitin busa dali niyang gidakop.

Gidala nila ngadto sa panimalay si Ypil, kinsa nag-party sa iyang birthday, uban sa mga silingan, kabanay, higala nga nagtagay samtang nag- videoke.

Ang bitin gisulod sa sako aron pagsiguro nga walay mapaakaan nga mga bata,. Si Ypil nga hubog na niadtong higayuna mikuha sa bitin kay iyang giduwaan.

Gidiretso lang sa pagkuha ni Ypil nga way kahadlok sanglit anad na siya niini, kay napaakan na usab kaniadto og bitin ug luwaan lang niya sa pagtambal.

Ang asawa nga si Divina nibutyag nga ang pinaakan sa bitin sa iyang bana, gitambalan lang niinig ahos ug "giyamyaman” human gihugasan og tubig.

Apan alas 4:00 sa hapon sa samang adlaw, mireklamo na ang iyang bana kay mihubag ang iyang tuong kamot ug bukton dili na niya malihok ug gihilantan. Hangtod nga pagka-alas 7:30 sa gabii, naglisod na kini sa pagginhawa dayon nawadag panimuot. Gidala sa tambalanan apan patay na siya pag-abot.

Sa paghiling ni Dr. Minerva Millor, hepe sa tambalanan sa dakbayan sa Bogo, nasuta nga walay foul play ang kamatayon ni Ypil.

Ang doktor mipasabot sa mga kabanay nga tulo ka oras lang paglamay sa “la” sa bitin diin paspas namatay si Ypil atungod wa madali sa pagdala sa tambalanan.

Ang pulis nga si Ancao miingon nga walay naka-ila kun unsang klase sa bitin kay ang mga tawo sa lugar wala makaila. Dili sab cobra apan nakita nila nga itom ang bitin lahi kumparar sa ubang makit-ang bitin.

Gawas niini sa pag-inspeksyon nilang mga pulis gisunog na sa mga kabanay ang bitin, mikupos na kini samtang ang ulo giputol, gida-uban ug gipalina. /