Talisay mopalit og deodorizer

Kagamhanan sa dakbayan sa Talisay mopalit og mga deodorizer chemical aron pagpawala sa baho sa ilang mga basura ug mga garbage truck ilabi na kon ang basura dili dayon diha makuha.

Una niini si Konsehal Manuel Cabriana, chairman sa committee on solid waste management, nisumitir og resolusyon nga nag-awhag ni Mayor Eduardo Gullas nga mogahin og pundo alang sa pagpamalit og kemikal.

Kini aron maoy ibutang sa ilang mga basurahan diha sa merkado ug ilabi na sa ilang mga garbage truck mismo nga dili manimaho.

Gipasabot ni Cabriana nga daghan karon sa mga basura sa Talisay ang nagtipun-og nga dili Dayton diha-diha mahakot sa mga garbage truck.

Kini tungod kay posibling naguba ang ilang garbage truck ilabi na karon nga pipila nalang ang nagdagan o ba kaha malangan sa pagkuha.

Mao kini hinungdan nga manimaho ug moreklamo ang mga tawo lakip na ang mga mamaligyaay ug mamalitay.

Matod ni Cabriana ang chemical nga paliton maoy ibutang sa mga basura aron dili manimaho lakip na sa mga garbage truck aron dili manimaho nga magdala sa ilang mga basusa.

Nagkanayon kini nga ang General Services Office (GSO) maoy gitahasan sa pagpamalit sa kemikal.

Sa iyang bahin, ang pangulo sa GSO nga si Joan Vebar niingon nga sa miaging administrasyon namalit sila sa maong matang sa kemikal.

Nagkanayon si Vebar nga iyang susihon ang maong resulosyon aron mapalit gilayon kini sanglit siya mismo miangkon nga aduna gayoy mga basura nga anaa sa karsada nga dili dayon mahipos ang manimaho.

Si Cabriana mihangyo sa taga Talisay sa pagsabot lang una kon dili dayon mahipos ang ilang mga basura tungod kay kuwang karon silag mga garbage truck.

Gibutyag ni Cabriana nga dunay higayon nga manghuwam na lang sila sa sakyanan sa barangay aron mahakot ang ubang basura laing barangay sa dakbayan.