SA SIOMAI SILA MIASENSO
Ang kinabuhi sa tawo puno sa mga pagsulay. Apan kon naa ang panaghiusa, pagtinabangay ug pagsinabtanay sa matag miyembro sa pamilya, ang tawo makabarog.
Sama kini sa sugilanon sa pamilya ni Leduvina Quillosa, nagpuyo sa Barangay Tisa, siyudad sa Sugbo, nga taliwa sa mga pagsulay, nakasugakod uban sa gabay ug pagsalig sa Ginuo.
Ang 51-anyos nga ginang gigasahan og walo ka mga anak uban sa iyang kapikas nga si Julius alyas Jokid.
Niadtong Marso 1, 1998, gihimugso ni Leduvina ang triplets nga mga anak nga sila si Jedd, Jake ug James.
Tungod sa kalisod, ang ilang mga kaila ug higala nitambag niya nga ibulag ang managsuon. Apan wa siya mosugot.
Nangayo usab siya og tabang sa Department of Social Welfare and Development (DSWD) alang sa gatas sa triplets. Apan giingnan siya nga kuhaon ang usa sa triplets ug dad-on sa Don Bosco sa Pasil, siyudad sa Sugbo.
“Wa ko mosugot. Maluoy ko malayo ang usa nila. Ig dako ana, dili na makaila nako,” pamulong ni Leduvina sa pakighinabi sa Superbalita Cebu.
Bisan sa kakabos, nakasugakod ang ilang pamilya sa inadlaw-adlaw nga panginahanglan pinaagi sa ilang negusyo, ang pagpamaligya og puto sa Barangay Tisa nga nagsugod niadtong 1995.
Nilambo ang ilang patigayon nga nasunod ni Jokid gikan sa iyang apohan nga babaye ug anam-anam nga niasenso ang ilang pamilya.
Pagka 2002, nag-usab sila og negusyo diin siomai, noodles ug pancit canton ang ilang gibaligya sa ilang kan-anan, Way Tugpahay.
Gumikan sa kugi ug paningkamot sa magtiayon uban sa abag sa nahabiling pito ka mga anak, inanay nga nilambo ang ilang negusyo nga siomaian ug niasenso ang pamilyang Quillosa.
Si Leduvina nidasig sa uban nga dili dayon mawagtangan og paglaom kon dunay mga pagsulay sa kinabuhi ug padayon nga mosalig sa Ginuo.
“Basta maayo lang gyud ang pagdala bahalag ginagmay sa sinugdanan, tarungon og dala ang mga customers,” dugang ni Leduvina. /