Baga'g nawong
Gipanghambog pinaagi sa iyang Facebook account sa "kanhi laos nga pulitiko" ang iyang hulagway uban kang Presidente Rodrigo Duterte atol sa pagbisita sa Presidente niadtong miaging semana atol sa groundbreaking ceremony sa third Cebu-Mactan bridge sa lungsod sa Cordova. Unya sa iyang post sa Facebook, gibutang didto nga nagka-estorya kuno sila sa Presidente ug dugay-dugay nga sila rang duha atol sa usa ka esklusibo mga panihapon. Daghan kuno sila og gi-estoryahan labi pa sa mga proyekto dinhi sa Sugbo. Wala siya mohatag og detalye kay ila ra kadto sa Presidente.
Kataw-anan, no? Unsa may ihatag niya nga detalye sa media nga wala man silay gi-estoryahan? Posing ra man tong maong litrato. Dili na tinuod nga nagka-estoryahanay sila og dugay-dugay sa Presidente ug exclusive. Unsa-on pagkaexclusive nga daghan man laing mga tawo didto. Diha sila si Gov. Junjun Davide, Mayor Luigi Quisumbing, PRO 7 Regional Director Noli Talino ug mga military officials. Unya mangangkon siya nga sila rang duha ni Duterte. Nayabag siya? Aw, kon publicity ang hisgutan "daog" kuno siya kay motuo man ang mga tawo kay sila ra gong duha. Pero ang mga tawo nga didto maka-ingon nga hambugero ra siya. Wala siya mauwaw?
Unya si Presidential Assistant Michael Lloyd Dino nga gikontrahan niining kanhi laos nga pulitiko maoy nag- host o nagbangka niadtong maong panihapon nga gipahigayon sa clubhouse sa Mactan Airbase. Dihay manok Bisaya, lechon baboy. Ang tawo nga iyang gihinganlan og "ok-ok" maoy naggasto ato. Nakapahulagway siya ni Duterte sa dihang nagbalhin-balhin ang Presidente og lamesa aron paghimamat sa mga inihap lang nga mga tawo nga didto apil na siya. Mibarog siya aron makapahulagway. Mao ra to ug wala sila magka-estorya sa Presidente og dugay. Unya iyang ipagawas nga suod sila sa Presidente. Ayaw ilara ang mga Sugboanon uy.
Atol sa iyang pakigpulong sa seremonyas sa groundbreaking, gipasi-atab aning "kanhi laos nga pulitiko" nga mao kini ang damgo sa iyang amahan nga taytayan nga magkonektar sa Cebu ug Mactan. Sus, kon nakadungog siguro ang iyang amahan nag-alimpasa o naglintuwad-lintuwad karon sa iyang lubnganan.