Katuyoan sa PDEA, CHR

Nahimong dakong isyu karon kining pagpahubo sa mga piniriso sa Cebu Provincial Detention and Rehabilitation Center (CPDRC) atol sa kinalit nga anti-illegal drug operations nga gipahigayon sa Philippine Drug Enforcement Agency (PDEA) sa Central Visayas niadtong Martes sa niaging semana.

Ang Commission on Human Rights (CHR) maoy daling misakay ning isyuha ug mihulagway nga usa kini ka kalapasan ug pag-abuso sa tawhanong katungod sa mga binilanggo.

Ilang gisaway ang PDEA-7 nga gipangulohan ni Regional Director Yogi Filemon Ruiz tungod sa pagmando sa tanang piniriso sa paghubo sa ilang mga sapot sa lawas ug gipalinya sa dakong hawanan sa CPDRC.

Hasta si Cebu Archbishiop Jose Palma mihulagway nga usa kini ka dili makiangayon nga binuhatan ngadto sa mga binilanggo samtang ang Amnesty International mipadayag usab nga dako kining binuang ug usa usab ka pagtamay sa mga piniriso.

Tungod niini, ang mga CHR investigators nga gipangulohan ni Leo Villarino, ning bag-ohay lang ug ubos sa pagtugot ni Roberto Legaspi, ang officer-in-charge sa CPDRC, nakighinabi sa pipila ka mga binilanggo isip kabahin sa ilang imbestigasyon.

Wa pa man tuod mobutyag si Villarino kon unsay ilang findings sa ilang imbestigasyon apan manghinaot ta nga dili kini makatabon ug makalubog na hinuon sa tinud-anayng katuyoan sa mga tinugyanan sa balaod nga mao ang pag-ila kon kinsa kining mga CPDRC personnel nga nalambigit sa pagpayuhot sa gidiling drugas sulod sa maong bilanggoan.

Kon tinguha sa CHR ang pagprotehir sa mga binilanggo nganong karon ra man sab ni sila molihok kabahin niini sud sa prisohan nga kadaghan dihang mga piniriso nga takalan o bun-ogon pinaagi sa pagbunal-bunal sa ilang sampot ginamit ang kahoy kon kini dunay gamayng kasaypanan nga mahimo.