Iuli sa Ayala ang mga lote?

Kaguliyang. Kon mobasa ta og mantalaan ug maminaw sa mga taho sa radyo ug TV matag adlaw, mora og way katapusan ang gumonhap sa katawhan ingon man sa mga problema nga giatubang sa atong panggamhanan.

Tungod sa problema sa ilegal nga drugas ug away sa mga pulitiko kabahin sa ilang katungod ug pulitikanhon nga interes ang uban serbisyo sa gobyerno ngadto sa katawhan ug katilingban natagam-an.

Ibalik na ang operasyon sa pulis batok sa ilegal nga drugas nga nahimo nga kontrobersiyal tungod sa mga tulisan nga pulis nga gihimo nga pangwarta ang “tokhang,” nga nakapaulbo sa kaspa ni PNP Chief Bato Dela Rosa.

Giundang ang operasyon “tokhang” dihang gidagit si Jee Ick Joo, Koreano, sa mga kurakot nga pulis ug gipatay sulod sa Camp Crame, ang headquarters sa PNP.

Drugs Enforcement Group (DEG) ang bag-o nga ngalan sa pundok sa pulis nga mopatuman sa balaod batok sa ilegal nga drugas. “Oplan Double Barrel Alpha”, ang bag-o nga ngalan, di na tokhang.

Giimbitar ni PNP Chief Bato ang kaparian nga mokuyog sa operasyon batok sa ilegal nga drugas. Ang kaparian usa sa mga kritiko sa operasyon “tokhang” tungod kay daghan, matud pa, ang inosente nga namatay sa operasyon. Mokuyog kaha ang mga pari?

Sa lain bahin, ang prisohan sa pulis sa lungsod Cordova puno pas puno. Gani, ang mga babaye ug lalake, nga mga detinado, giipon sa usa ka selda. Asa man ang Commission on Human Rights (CHR)?

Samtang mireklamo sa CHR nga gihuboan ang mga detinado sa CPDRC atol sa raid sa PDEA sa ilegal nga drugas, wa sila moreklamo sa kahimtang sa mga detinado diha sa Cordova Police Station nga mora sila og gisulod sa sardinas.

Nahimong komedya gahapon sa radio program “Frankahay Ta” (dyCM 1152AM) nga ang giipon sa mga babaye nga detinado sa Cordova kadtong mga lalake nga ang kaso dili rape o seduction.

Angayan nga padak-an ni Cordova Mayor Tetsie Sitoyang selda sa Cordova Police Station kay makadaut sa imahin sa iyang administrasyon labina sa iyang amahan, Sec. Ady Sitoy, nga presidential adviser ni Pres.Digong Duterte.

Linya? Morag iuli sa Ayala Land ang mga lote nga iyang napalit sa SRP sa panahon ni kanhi mayor Mike Rama bisan og silang duha sa SM Properties ang mipalit atol sa public bidding.

Usa ka gabii niadtong miaging semana, mitaho ang akong tinudban nga usa ka abogado nga nagtrabaho sa Ayala nakigkita ni Cebu city Mayor Tommy Osmeña. Wa hinuon mosulti ang akong tinubdan kon unsa ang ilang gihisgotan.

Ang Filinvest ang una nga misurender na ni Mayor Tommy, Iyang iuli ang mga lote sa SRP nga napalit sa panahon ni Mayor Rama. Ang BDO, nga gipanag-iya sa SM, giinitan na sa mayor. Apan ang Ayala wa hilabti.

Ang giingon nga abogado suod nga higala sa usa sa mga sinaligan ni Mayor Tommy. Mao ba kaha ni ang linya sa Ayala didto ni Mayor Tommy? Ang pangutana, iuli ba sa Ayala ang lote nga iyang napalit? Atong huwaton unsay sunod.