You mean everything to me
Sa sitwasyon ni Marlou, mobati gyud kog kaluoy niya. Ang iyang Papa. Si Noy Dino, drayber namo kaniadto. Ug si Nang Talya nga katabang na sab namo, wa makalikay sa pagpakigrelasyon kang Noy Dino. Apan igo lang gipamabdosan ni Noy Dino si Nang Talya. Milayas si Noy Dino, ug sa pagkatawo ni Marlou, kauban na namo siya sa pagpuyo sa among balay.
Parehas mig edad si Marlou. Nakahibawo ko sa nahitabo sa kinabuhi ni Marlou kay gisuginlan man ko ni Nang Talya sa tanan.
“Sagdi lang, Marlou. Destiny gyud nila ni Nang Talya ug Noy Dino nga di sila para sa usag usa. Ingon man gyud kuno ani ang tawo, dunay tagsa-tagsa ka destiny sa kinabuhi.”
“Mao lagi, Katrina. Nadawat ko na man sab ang reyalidad nga di na gyud mat- ibuok ang pamilya namo ni Mama ug Papa.”
Gitutokan ko si Marlou. Kon hitsura ang hisgotan, di sab siya maiwit. Guwapo ug nindot og lawas si Marlou. Buotan siya. Unongan ko niya kon duna koy problema. Sila si Mama ug Papa ang naggasto niya sa pag-eskuwela. Graduating na siya sa kursong Business Administration.
Mitindog si Marlou. Gipalingkod ko niya sa swing. Every now and then itabyog niyag hinay ang swing. Usahay magpahiyomay mi si Marlou.
“Kuan diay, Mar, if you don’t mind, may ipangutana ko nimo. Medyo personal ra ni. Bahin ba sa imong lovelife.”
Mipakibo sa mga abaga si Marlou. Mikatawa siyag hinay.
“Lovelife? Well, mosu’od man gyud ang tawo nga normal sa pagpakigrelasyon sa opposite sex. But for me, wa pa ko ana maghunahuna ron, Kat.”
“Why man? Don’t tell me nga wa kay nagustohan girl? Guwapo ka man.”
“Thank you sa pagdayeg. Aw, duna man koy nagustohang girl. Pero wa ko maghunahuna nga pangulitawhan siya. Nag- concentrate ko sa akong pag- studies ron. Gusto kong makahuman gyud sa college. Asa ra man gud nang girl, uy. You know, Kat, kon makauyab ko, pakaslan dayon nako siya.”
Nakapanglingo na lang ko kay mikatawag kusog si Marlou. Wa ko isulod sa akong hunahuna ang iyang gisulti. Unya, nanulod na mi si Marlou sa balay. Bugnaw na ang hangin.