Panagsa ra

Dear Noy Kulas,

Ako si Lita, minyo sa usa ka foreigner ug duna mi anak. Ang akong bana wa makabase dinhi sa Pilipinas, magbisitahan ra siya sa amoa ug magsustento pirme. Dunay mga estorya nga ako ang gipakaslan pero daghan ming mga babaye. Ako na siya gi- confront ani, apan masuko siya kon maghisgot na ko mao nga di na lang nako iinsister aron malikayan ang away.

Naa koy classmate sa high school nga akong crush sa una nga nitunga sa among reunion. Biyudo na siya bisan medyo bata pa mi og edad kay namatay ang iyang asawa sa cancer. Ambot nabanhaw ang akong feeling para niya human mi magkahimamat og usab. Karon, magsige na mi og chat sa Facebook.

Ang akong gikinahanglan sa akong bana akong nakita diha niya. Naa tuod koy bana pero sa pagkangan lang. Mga duha o katulo ra siya makaduaw namo ug ang pinakataas one week ra ang iyang stay.

Noy, unsa may akong buhaton alang niini? Moprangka ko, nagkinahanglan ko og full-time nga bana, di part-time. Tambagi ko. LITA Lit,

Ayaw kahadlok sa pagsulti sa imong bana regarding anang butanga kay magtiayon na mo. Duna kay katungod nga modemanda kon unsa may iyang pagkuwang diha kanimo ug sa inyong mga anak. Mao bitaw nga naa sa Family Code ang responsibilities sa magtiayon. Kon dunay magkuwang ug kini dako, mahimong ground na sa panagbuwag.

Di ko mo- encourage anang biyudo bisan kon dunay pagkuwang ang imong bana kanimo. Huna-hunaa ang imong mga anak nga hayan gagmay pa, di makasabot nganong ilisan mo ang ilang amahan nga ilang namat-an og kahayag. Sulbara og una ang inyong problemang magtiayon nga way kukahadlok. Diha mo masuta kon tinud-anay bang dunay pagbati ang imong bana kanimo ug sa imong anak. Mao usab ni ang imong sukaranan sa sunod mong lakang, makigbuwag ka ba niya o di.

Timbanga og maayo ug ilambigit ang imong pamilya.

NOY KULAS