Dalan sa arte ug kamatayon
Gusto pa unta siyang mosulat apan ingon sa mibadlong na ang iyang lawas. Mihugo siya ug wala na siya matingala bahin niini kay duna siyay sakit ug siya mismo nahibawo nahibawo na kon unsay iyang sakit. Matod sa doktor mahimong kutob na lang sa tulo ka bulan ang lugway sa iyang pagpakabuhi ning kalibutan. Kaanugon no?
Sa atubangan sa salamin sulod sa iyang lawak nakita niya ang iyang kaugalingon. Milubyok na gayud ang iyang mga mata. Hinuon, dili na siya magmahay kay nakasuwat man siyag mga sugilanon, balak ug mubong nobela. Sa gidugayon sa iyang pagpanuwat natilawan niya nga duna usay kapait kining matanga sa arte. Hinuon, kon pukawon ka sa imong gana mobangon ka gyud bisan pag tungang gabii. Daw multo, daw kalag ug kini dili mapugngan. Matag minuto o dahili sa mga takna, ang dagayday mao gihapon.
“Midaot lagi ka, Deks,” nakamatikod ang higala niyang magsusulat nga bag-uhay lang sab nga misum-ok sa kalibutan sa panulat. “May sakit ka?”
“Oo, Bay Migs, duna,” tubag ni Deks. “Ug inig-abot sa tagal, babay na ko ninyo...”
“Unsay babay god. Ang buot mong ipasabot nga manamilit na ka. Mao ba? Bay Deks, pag-ampo. SIYA ra gyud ang makatambal nianang imong sakit,” midiyong ang mga mata ni Migs.
Wala motingog si Deks. Iyang gitunol ang kopya sa SUPERBALITA diin naa ang iyang sugilanon nga napatik.
“Imo diay ron ang sugilanon, Bay Deks,” hinay nga tingog ni Migs nga miagda kang Deks nga manulod sila sa usa ka restawran
Nanulod sila. Nangaon, nag-inom og gamay. Naghisgot-hisgot bahin sa panulat. Unya nanamilit sa usag usa dihang pasado na sa alas diyes sa gabii.
HILOM ug mingaw ang ilang balay. Sila si Papa ug Mama ni Deks tua sa usa ka tigom nga relihiyuso. Diyusnon ang iyang ginikanan, si Papa Caloy ug si Mama Sima. Sayod siyang giapil siya sa iyang Mama ugPapa sa ilang mga pag-ampo. Apan kawang lang kay hapit na moabot ang iyang katapusan. Tulo na lang ka bulan ug magkita na sila si Lord didto sa Langit.
Iyang gikuha ang mga ginunting nga mga sinulat nga mga sugilanon, balak,gumalaysay, mubong nobela nga iyang ‘collection’ sa mga sinulat sa mga inilang magsusulat nga iyang gidayeg ug giidolo. Naa sa ‘collection’ ang mga sinulat nilang Oliver Flores, Erlando Ligan Majan, Kevin Lagunda, Christopher Fajardo, Prescil Canete, Alcea Maningo, Fred Monternel ug Gally Sayson. Matag higayon nga iya kining paklion ug basa-basahon, daw bulawan nga mogilaw ang ilang mga sinulat. Ug karon, ning hilom nga gabii, iyang gikuptan ang ‘collection’ ug iyang gitapion sa iyang dughan. Unya hinayhinay siyang milakaw ug nanaog sa silong.
Didto sa tugkaran kalit nga mibunok ang makusog nga ulan, apan dili na siya mahadlok nga mabasa sa ulan. Importante alang kaniya nga magpasinguwan dala ang mga hulad sa arte nga anaa karon iyang gisapnay. Unya nadunggan niya ang tingog sa iyang Mama Sima nga nagtawag kaniya nga mabalak-on. Lanog apan malumo ang tingog sa iyang inahan. “Dekssssss! Dekssssss! Asa ka? Ayaw pagpasinguwannnnnn! Deksssssss!” Ug mipahiyom si Deks. (KATAPUSAN)